敏妮Talk

之前講過，家陣做定期存款，短好過長，除咗港元定存，人民幣定存一樣短好過長，因為各家銀行都想搶人民幣存款，「息」誘存戶呢啲招數幾乎走唔甩。

今個星期一人民幣《清算協議》修訂正式簽署後，呢幾日陸續見到好多金融機構推出人民幣產品，有朋友問應該點揀。敏妮大致將人民幣產品歸納為三類：第一類係人民幣存款，第二類係保險產品，最後一類係風險相對較高嘅投資產品。

講到人民幣存款，香港銀行提供嘅息暫時同內地銀行都仲有一段距離，要做人民幣定存，不如返大陸開戶口。家陣有好幾家銀行提供一條龍內地開戶服務，但部份如恒生銀行，會要求客戶先返內地分行一次以確認戶口，之後就可以喺香港滙錢返自己大陸個戶口。專家都話人民幣升值步伐唔會太快，即係話人民幣要睇長線，咁就值得返去內地一次，開個內地人仔戶口，方便長揸人仔，博更大升值空間。

壽險回報 低過北上做定存

至於人民幣保險方面，家陣市場上見到嘅產品，大部份係一啲比較短期嘅壽險儲蓄計劃，除咗中銀提供終身保障，其他最長都係得 10年。敏妮唔只一次講，唔好當保險係投資產品，應該當係消費品，付出金錢換取保障，即使係人民幣保險都應該有咁嘅概念。就以回報嚟計，國壽海外嘅 10年期壽險，據報道，已經係市場上最有競爭力，但都係保證有 2厘回報左右，返大陸做人仔定存收息回報仲高。除非你計過數，自己嘅保障唔足夠，有加碼需要，就不妨考慮用人仔保單補不足。

至於投資產品，敏妮暫未見市面有人民幣基金新產品，反而掛鈎存款就有幾家銀行推出。不過，掛鈎產品其實係由期權衍生出嚟，如果連期權概念都未搞清，就唔建議去搞啲掛鈎產品！想博高回報，不如買受惠人民幣升值嘅股票，起碼係大路選擇，市況就的話回報唔差，市況唔就都可以收息長揸。

世界盃終於完咗，之前好多人話後市難估，加上要睇世界盃，所以實行放暑假，棄股睇波。不過，事實上呢段時間敏妮啲 friends就朝朝忙住炒股。

着衫唔知潮流最多俾人話你 out，但炒股唔知潮流就好容易損手。呢排唔知大家有冇發覺，個市好多時都係開市升一浸，未到中午已經腳軟，唔少股份都係開市無耐已經見咗當日高位，後繼無力。敏妮啲 friends就係掌握大市呢個節奏，朝朝早都短炒。朋友仲話：「只會睇 3分鐘，就係博佢升幾格，捉錯路或者唔郁即走，唔會磨爛蓆。真係差一格半格唔到目標價都要放手，千祈唔好死心眼。」 3分鐘淥個杯麪嘅時間，估唔到都可以「善用」。

除咗要快閃，家陣熱炒嘅亦唔係房託基金 REITs或者濠賭股之類，而係炒 rights，即係供股權。其實炒供股權唔係近期嘅事，但最近唔少公司供股，好多唔想供股嘅散戶，選擇將供股權沽出，接貨嘅人未必真係想藉 rights以折讓價買股，只係想炒一回。點解咁講？好似之前有隻股嘅供股權有得 trade，供股價三毫七，正股 trade緊四毫幾左右，按道理 rights合理價唔會超過一毫，點知 rights炒到一毫樓上。

炒供股權　似炒末日輪

供股權壽命短，正配合家陣大市嘅「節奏」。其實炒供股權唔係家陣至流行，只係近呢三兩個月似乎特別興旺。不過時興唔代表啱所有散戶，買賣供股權有啲似炒末日輪，時間值損耗得好快，唔夠決斷跟唔上節奏，都係唔好亂玩。

今年初，敏妮曾經提過一位有「早啲退休」目標嘅朋友，計劃退休之後做有關親子理財嘅教育工作，呢位朋友喺證券界打滾多年，不愁生活，但為咗教育兩個寶貝仔，得閒會帶佢哋去深水埗天光墟擺檔，以一、兩蚊嘅價錢賣舊物，等囝囝體驗草根階層嘅生活。

敏妮講緊嘅呢位朋友，就係法興嘅李錦 Edmond。敏妮發覺，爸爸媽媽付出幾多心力，喺子女身上係會反映出嚟嘅。

攜子擺檔　學習不亂花錢

最近 Edmond出咗本新書《從一元開始》，分享同兩個仔澤基同澤恩喺天光墟擺檔嘅所見所聞。聽 Edmond講，帶囝囝去天光墟，係要佢哋明白即使係一蚊幾毫，對低下階層嚟講都好重要，唔會亂花，從而令小朋友學懂珍惜。喺書裏面，澤基同澤恩各自寫咗對天光墟嘅感想，澤基話：「那些伯伯很認真看過才買的，他們看清楚那一元是否值得花。」睇嚟 Edmond呢課親子理財課頗成功。

新書內仲有一章講親子理財學習課題，由考慮幾時開始畀零用錢子女？畀幾多？到教導子女點樣管理呢份「收入」？ Edmond用自己同孩子嘅相處作為例子。

Edmond話，兒童理財分三個階段，按當時孩子嘅年齡同成熟程度，灌輸不同嘅理財觀念，好似到咗小學階段，孩子只需要事前知會父母，就可以全權負責處理零用錢，咁做係養成對自己負責任。

佢會容許孩子喺急需用錢時「入不敷支」，更可預支零用，但預支咗下個月零用，代表下個月少咗錢使，等孩子知道先使未來錢係要付出代價嘅。好多專家都話理財越早開始越好，由細培養子女理財知識，將來縱使未必富貴，但起碼唔會因為財務問題失去自由。敏妮相信理財目的除咗令生活無憂，更重要係唔會成為別人負累，有剩嘅話仲可以幫人。

Yoyo喺敏妮 blog留言，話有 4個女兒，分別 28、 27、 25同 20歲，佢想同四千金買醫療保險、基金，同儲錢安排退休。不過，每月只係得 1500蚊盈餘，都唔知點分配。其實單係買醫療保險，每個月幾十蚊都有交易， 4個女夾埋唔使兩百蚊。但買基金月供最低消費都 1000蚊，唔通供一份 4個女分？講笑！

敏妮只係搞唔清楚 Yoyo想為自己安排退休，抑或為女兒？為人父母，對女兒自然無微不至，但讓女兒學懂為自己籌謀，可能畀幫佢鋪好人生道路更有意義。女兒都廿幾歲咯，買基金儲錢安排退休，應該由佢哋自己着緊，作為媽媽從旁提點已經足夠。

先為自己做醫保退休安排

作為人家嘅女兒，敏妮始終覺得孝順父母天經地義，要爸爸媽媽反過嚟為自己操心，會唔會俾雷劈呢可？真係擔心女兒嘅，建議 Yoyo做好自己嘅退休安排同醫療保障，唔使女兒擔心就好足夠。如果真係想做詳細啲嘅理財策劃，由於敏妮掌握的資料唔多，呢個欄篇幅有限，建議將聯絡方法電郵去 money@appledaily.com，等敏妮對你嘅情況了解清楚先提供意見。

另外，上次敏妮提到有關期權嘅問題，有位朋友 Wahhy留言問，點解咁少人介紹期權玩法？據股王 A講，期權易學難精，最重要係學識咗要有穩定嘅回報唔難，但要賺大錢就唔易，而且期權注重策略運用，唔係靠聽冧巴，所以唔係好啱一般散戶嘅胃口，相信呢個係期權少人介紹嘅原因之一。

不過，期權並唔係咁高不可攀，敏妮認識資深期權投資前輩杜嘯鴻，據佢講，善用期權，每個月都可以搵到穩定嘅收入，亦可以自己控制投資風險。如果 Wahhy對期權有興趣，可以參加 8月 7日由《港股王》舉辦嘅「期權工作坊」，佢哋邀請咗杜前輩同另一位資深期權投資者金曹做主講嘉賓，分享投資經驗。收費 100蚊，但送 1個月《港股王》網上收看服務，價值 138蚊，淨係贈品都貴過票價。

眨吓眼， 2010年又過咗一半，睇番個 portfolio，有贏緊嘅亦有坐緊艇嘅！近期見到啲投資界嘅前輩，敏妮總不忘問吓佢哋點睇下半年個巿，大部份意見係「審慎樂觀」。

實情係大家都覺得個巿應該好，但就硬係升唔上，有嘢睇唔清，咁就惟有等機會啦！等，可以，但唔係呆等。青春無限都唔使咁嘥，市況混沌難測兼有貨坐艇嘅時候，敏妮都會用期權搵啲 pocket money。

可買可沽　當幫股票買保險

記得之前有朋友喺敏妮 blog留言，「不滿」敏妮居然叫人做期權，話大戶先需要用期權對冲手上持貨，因為佢哋貨太多，如果減持或者沽貨之後，要補番貨嘅成本太高，所以要用對冲方法。散戶絕對唔需要，因為覺得市況差，可以沽貨，唔係買多張衍生工具。

其實散戶同大戶都係真金白銀投資，都有成本，大戶 lot貨大，成本就大，難道散戶炒股唔使成本？相對注碼同回報比例，可能好多散戶都覺得自己炒股成本唔輕，點解唔可以好似大戶咁做對冲？

再者，買期權同買股票一樣，一手作單位，入場門檻又唔使一球球美金，非大戶專利。何況期權唔一定買，可以沽。就以呢位朋友所講，家陣市況差，又驚沽貨後個市升要補貨，沽個認購期權，收期權金，到價先沽貨又得；買個認沽期權，當幫股票買個保險又得，個市真係差咯，都可以預定沽貨價，將坐艇嘅貨沽出。

覺得敏妮一知半解唔識嘢信唔過？以下係好機會喇，「港股王」搵咗有好多資深期權投資者坐鎮嘅「期權教室」，合辦期權講座，深入淺出解釋點樣用股票期權、指數期權保障投資組合，兼賺取穩定回報，對期權唔了解又想知多啲嘅朋友最啱聽。