敏妮Talk

成日聽人話，經濟已步入復蘇，但港府前排公佈失業率升咗，同樣升嘅仲有通脹。有份工嘅就要努力工作，保住飯碗喇，唔係點面對通脹壓力！

有朋友同敏妮講：「大不了全職炒股。」雖然港股九連升，但始終唔係大牛市，唔係瞌埋眼炒股都會贏嘅時候噃！「敏妮，你唔係話過，炒期權，乜嘢市況都可以贏錢咩！」理論上係，但要熟悉呢種投資工具，同好投入去做，對於新丁嚟講，咁快就諗住靠投資期權過活，會唔會樂觀咗啲呢？

熟客定存息可比牌價高

不過，對於穩陣派投資者嚟講，家陣係好日子，因為銀行差唔多隔日就有新優惠推出，而且「高息戰」由定存蔓延到去活期存款。好似去大眾銀行新開活期存款戶口， 10萬蚊樓下有 0.2厘息， 10萬銀以上就有 0.15厘息，但以日息計算，當日最低結餘 3000蚊或以上，嗰日先至計息，比起唔少銀行嘅 1個月定存仲高息。

其實唔使等銀行嘅推廣先至有優惠，熟客嘅定存息率通常都有得傾，可以比牌價高，而且間間分行唔同。熟客唔一定要好似敏妮媽咪咁，得閒冇事都落銀行，同相熟經理或者 teller打牙骱先叫熟客。開戶一段時期，或者幫襯咗其他銀行服務，做定存時，開口同銀行問吓有冇優惠啲嘅息率，識做生意嘅銀行，通常都有啲驚喜。之前有銀行推 1個月銀行定存有 1厘息，但限期只有 1個月，而且只限 30萬蚊，其實老早已經有銀行向熟客提供 3個月定存 1厘息優惠。

講開銀行推優惠，其實唔係香港銀行先至識做，好似喺深圳嘅建行就推出 91日人仔定存優惠，利率高達 3.7厘，據講吸引唔少經常往返中港兩地嘅港人去開戶。

除咗創興銀行同大眾銀行推出一個月定期存款有 1厘息嘅優惠搶客，唔少銀行都推出不同類型定存優惠，例如定存 12個月，年息可以超過兩厘。即使所有計劃都係儲蓄，而且至年底有百分百存款保障，風險近零；不過資金有限，優惠花款無限，要揀最抵最着數。

慳妹睇完，即刻對年息超過兩厘嘅推廣有微言，因為有關定存息率主要係以該銀行嘅 1年期牌價為基準，即係唔夠 1厘，至於最後可以超過兩厘，係因為加上額外優惠利率，同現金回贈；不過現金回贈並唔係保證一定攞到，首一個月只係攞到現金回贈嘅一成，至於剩低九成，要等到期前一個月才有。

其實，創興嘅一個月定存 1厘息優惠，雖然係好短期優惠，且上限得 30萬蚊，即係到期收 250蚊息；不過只係放 1個月，咁啱呢個月個個掛住睇世界盃，股市睇怕都會淡靜為主，都推出得幾合時機。仲有，呢款一個月定存優惠，較其他息率較高但年期較長嘅定存計劃吸引嘅另一原因，係彈性較大。

穩陣兼有彈性

歐洲債務危機影響幾深，會否掀另一個金融海嘯，大家唔知，銀行同業拆息幾時再升又係未知數，但近期銀行拆息的確有趨升現象。

貸款係銀行最好賺嘅生意之一，但都要自己有錢先可以借畀人，中小型銀行一係向同業借，但同業拆息高，意味成本要增加。咁就惟有用另一方法，吸引存戶放多啲錢喺佢度。如果呢個趨勢延續，會有更多銀行提高定存息率，所以家陣盡量做短期定存，一來穩陣，二來年期短，可以有彈性，唔會因為資金被鎖死， miss咗陸續推出市場嘅其他優惠。
溫敏妮

泰國出現 20年嚟最嚴重嘅旱災，估計大米產量減少六成。泰國係主要大米出口國，香港入口嘅食米主要都係嚟自泰國，大米失收，米價自然貴，好「炒」嘅投資者當然喺市場搵相關受惠股。結果有個「米」字嘅就「得米」咯！金源米業（ 677）連升兩日，皆因佢係從事「米業」，米貴大家當然覺得「米業」嘅股價亦會跟住貴。

不過，金源主要業務係「從事搜購、入口、批發、精細加工、包裝、市場推廣及銷售食米；證券投資、物業投資及投資控股。」

食品股冇乜稻米生產商

撇除同食米無關嘅業務，簡單嚟講，金源並唔係稻米生產商，只係做食米貿易，米貴對佢嚟講唔可以話一啲都唔受惠，好似啲存貨就因為米價提升而水漲船高，不過要用較高成本入新貨，所以就算受惠，都係有限。

如果金源揩到邊都有人追捧，咁另一隻嘅升勢應該更凌厲！據呢家公司嘅年報描述，佢係「中國最大的大米出口商及國內領先的包裝米供應商，主要從事白米及蒸穀米貿易與加工」，呢家公司就係中國糧油控股（ 606），正所謂「唔怕生壞命，最怕改壞名」，同樣做食米貿易同加工，話之你係全國最大，股價只係「係咁易」升咗一日就支持唔住，同金源冇得比。

既然做貿易同加工唔算最大受惠者，股王 A考敏妮，邊隻股先係食米生產商，敏妮摷咗多隻食品股嚟睇，中國食品（ 506）做酒類、飲料，食品方面得廚房食品即係食用油同調味品，另外仲有朱古力等休閒食品，唔覺有米！

至於超大現代（ 682）種菜嘅，中國綠色食品（ 904）做嘅新鮮農產品，只有長葱、甜玉米、西蘭花同白蘿蔔，又係冇米！究竟邊隻股係做食米生產，今次真係考起。

世界盃嚟緊星期五開鑼，一直打到 7月 12號，股王 A話，呢段時間冇人炒股，所以休戰一個月睇波。平日股票投資當然可以休戰，但打工仔每月供強積金，呢項投資就冇得停。
同樣關乎強積金，中銀保誠上個禮拜宣佈，減基金管理費迎積金半自由行，相信遲啲會陸續有受託人加入減價行列，尤其市佔率高嘅，憑着規模效益，減起上嚟相信會好狠。

受託人減價可以令打工仔更關注自己份強積金，因為一講到減價，大家都唔會執輸，反而平日大家對積金投資就唔係咁貼市。好似之前有報道，歐洲債務危機整冧個市，再拖累強積金回報。唔少打工仔家陣先諗，使唔使轉吓個投資組合避險。

可能係受理財專家潛而默化影響，認為月供強積金係利用平均成本法，拉勻入市價，降低風險，只要睇長線，就唔使成日轉 portfolio，避免高買低沽。

未必可拉低買入成本

其實平均成本法唔一定拉低買入成本，經濟起跌周而復始，如果喺升浪時開始供款，到跌浪時退休，即使以平均成本法買貨，但全部升市時貴買，即使臨尾幾年市跌令到用同樣金額買多啲貨，都唔足以「溝淡」之前買落嘅貴貨。

敏妮有個朋友，曾經做過一個統計，同樣定額投資，但只喺恒指市盈率低於某個百分比時先入市，結果有更好風險回報。假設以相關性啱啱相反嘅投資產品作入市選擇，好似股市跌通常債券升，再用朋友嘅入市策略做藍本，睇吓當時邊類投資產品市盈率低先買入。好似去 supermarket入貨，嗰期邊隻貨做特價先買，回報可能比單靠平均成本法高。當然，如果隻貨已經過期兼壞咗，就更便宜都唔應該買。

理論係咁，仲要試下可否實踐同成效如何。講到尾，投資無論短中長線，都要貼市隨時做好部署，邊可以蹺埋手，用梗一套策略就食糊！

最 近 敏 妮 被 問 到 一 個 跟 進 修 同 就 業 有 關 嘅 問 題 ， 唔 係 咁 易 俾 意 見 ， 即 使 睇 書 兼 問 其 他 專 家 朋 友 ， 答 案 都 係 模 稜 兩 可 。
話 說 一 個 讀 緊 書 嘅 朋 友 ， 前 兩 年 見 金 融 業 好 景 ， 於 是 選 修 相 關 嘅 科 目 ， 諗 住 學 成 畢 業 ， 就 成 為 金 融 界 嘅 天 之 驕 子 搶 手 貨 。 當 年 相 關 科 目 甚 搶 手 ， 佢 掹 車 邊 入 到 ， 但 都 讀 得 幾 辛 苦 ， 過 咗 年 幾 兩 年 ， 金 融 市 場 已 經 唔 同 晒 ， 佢 開 始 後 悔 當 年 係 咪 揀 錯 科 目 ， 「 敏 妮 ， 我 覺 得 自 己 可 能 唔 係 咁 適 合 讀 finance 呢 科 ， 我 考 慮 緊 係 咪 應 該 轉 讀 第 二 個 科 目 ， 家 陣 就 算 畢 業 ， 都 唔 知 搵 唔 搵 到 相 關 嘅 工 。 」

難 求 一 份 安 穩 工 作

究 竟 讀 書 揀 科 目 以 乜 嘢 為 大 前 提 呢 ？ 好 多 父 母 都 會 提 醒 子 女 ， 做 人 要 腳 踏 實 地 ， 揀 啲 「 搵 到 食 」 嘅 科 目 最 實 際 ， 醫 生 、 律 師 、 會 計 師 ， 畢 業 唔 怕 失 業 。 不 過 年 輕 人 有 夢 想 、 講 理 想 。
最 近 敏 妮 睇 《 華 爾 街 日 報 》 有 篇 專 欄 文 章 講 ， 就 業 穩 定 與 職 業 興 趣 ， 點 樣 分 輕 重 。 文 章 有 一 句 幾 可 圈 可 點 「 在 當 前 經 濟 形 勢 下 ， 無 論 你 從 事 何 種 職 業 ， 很 難 找 到 穩 定 的 就 業 機 會 。 」 單 係 呢 句 說 話 ， 敏 妮 以 為 結 論 會 係 既 然 穩 定 嘅 工 難 求 ， 咁 就 揀 興 趣 ， 起 碼 自 己 開 心 ， 但 文 章 其 實 冇 就 呢 個 命 題 落 結 論 。

提 升 自 己 增 投 入 感

講 返 之 前 嗰 位 讀 緊 書 嘅 朋 友 ， 佢 認 為 自 己 唔 適 合 讀 finance ， 相 信 好 大 原 因 係 佢 唔 能 夠 喺 呢 個 科 目 上 有 成 功 感 ， 加 上 周 圍 環 境 大 氣 候 嘅 影 響 「 造 就 」 ， 佢 就 越 想 放 棄 。 正 如 《 華 爾 街 日 報 》 篇 專 欄 文 章 講 ， 今 時 今 日 穩 定 嘅 工 難 求 ， 講 真 有 幾 多 人 真 係 搵 到 份 自 己 鍾 意 ， 又 穩 定 兼 賺 到 錢 嘅 工 ？ 既 然 唔 能 夠 提 早 退 休 ， 惟 有 面 對 現 實 繼 續 工 作 ， 積 極 啲 諗 ， 提 升 自 己 ， 做 到 自 己 滿 意 嘅 成 績 ， 其 實 可 以 增 加 自 己 對 工 作 嘅 投 入 感 。