敏妮Talk

上個星期六，港股王舉辦期權工作坊，多位期權專家齊集九龍灣展貿，同大家講吓期權策略。敏妮當然唔執輸，皆因喺出席期權工作坊之前，敏妮做咗個錯嘅投資，就係 short咗 9月份滙控（ 005）嘅 call，行使價 80蚊。點知滙控走勢凌厲，到咗行使價，好彩 short call畀敏妮嘅對家未行使買入權。

敏妮咁勇，全因手上有啲滙控係當年世紀供股時供返嚟嘅，成本低所以即管博吓，為咗日後期權策略做得更好，所以工作坊當日，敏妮一見到熟悉股票期權嘅前輩 Fongfong，即刻求教。點知 Fongfong前輩話，佢之前都做咗同樣嘅 short call，但反手喺 70幾蚊做番 short put，仲話正股俾人 take咗嘅話，收返嚟嘅錢可以作為接貨準備，即使未能到價接貨，都可以收期權金。做期權就有呢個好處，即使做錯咗都可以有方法補救。

初哥寧少收期權金

講開做期權，最近恨得牙癢癢嘅係見住和黃（ 013）係咁升，敏妮一股都冇。前輩歐陽風醒咗隻和黃 call輪畀敏妮，一開市就升咗七成，唔敢高追，於是用一個較「皇道」嘅方法，就係 short put和黃期權。揀咗 10月份、 52.5蚊接貨，歐陽風聽到之後話，唔怕揀 58蚊接貨噃，但敏妮超級保守，寧願收少啲期權金。畢竟仲係期權初哥，都係打穩基礎先好。

世界盃終於完咗，之前好多人話後市難估，加上要睇世界盃，所以實行放暑假，棄股睇波。不過，事實上呢段時間敏妮啲 friends就朝朝忙住炒股。

着衫唔知潮流最多俾人話你 out，但炒股唔知潮流就好容易損手。呢排唔知大家有冇發覺，個市好多時都係開市升一浸，未到中午已經腳軟，唔少股份都係開市無耐已經見咗當日高位，後繼無力。敏妮啲 friends就係掌握大市呢個節奏，朝朝早都短炒。朋友仲話：「只會睇 3分鐘，就係博佢升幾格，捉錯路或者唔郁即走，唔會磨爛蓆。真係差一格半格唔到目標價都要放手，千祈唔好死心眼。」 3分鐘淥個杯麪嘅時間，估唔到都可以「善用」。

除咗要快閃，家陣熱炒嘅亦唔係房託基金 REITs或者濠賭股之類，而係炒 rights，即係供股權。其實炒供股權唔係近期嘅事，但最近唔少公司供股，好多唔想供股嘅散戶，選擇將供股權沽出，接貨嘅人未必真係想藉 rights以折讓價買股，只係想炒一回。點解咁講？好似之前有隻股嘅供股權有得 trade，供股價三毫七，正股 trade緊四毫幾左右，按道理 rights合理價唔會超過一毫，點知 rights炒到一毫樓上。

炒供股權　似炒末日輪

供股權壽命短，正配合家陣大市嘅「節奏」。其實炒供股權唔係家陣至流行，只係近呢三兩個月似乎特別興旺。不過時興唔代表啱所有散戶，買賣供股權有啲似炒末日輪，時間值損耗得好快，唔夠決斷跟唔上節奏，都係唔好亂玩。

眨吓眼， 2010年又過咗一半，睇番個 portfolio，有贏緊嘅亦有坐緊艇嘅！近期見到啲投資界嘅前輩，敏妮總不忘問吓佢哋點睇下半年個巿，大部份意見係「審慎樂觀」。

實情係大家都覺得個巿應該好，但就硬係升唔上，有嘢睇唔清，咁就惟有等機會啦！等，可以，但唔係呆等。青春無限都唔使咁嘥，市況混沌難測兼有貨坐艇嘅時候，敏妮都會用期權搵啲 pocket money。

可買可沽　當幫股票買保險

記得之前有朋友喺敏妮 blog留言，「不滿」敏妮居然叫人做期權，話大戶先需要用期權對冲手上持貨，因為佢哋貨太多，如果減持或者沽貨之後，要補番貨嘅成本太高，所以要用對冲方法。散戶絕對唔需要，因為覺得市況差，可以沽貨，唔係買多張衍生工具。

其實散戶同大戶都係真金白銀投資，都有成本，大戶 lot貨大，成本就大，難道散戶炒股唔使成本？相對注碼同回報比例，可能好多散戶都覺得自己炒股成本唔輕，點解唔可以好似大戶咁做對冲？

再者，買期權同買股票一樣，一手作單位，入場門檻又唔使一球球美金，非大戶專利。何況期權唔一定買，可以沽。就以呢位朋友所講，家陣市況差，又驚沽貨後個市升要補貨，沽個認購期權，收期權金，到價先沽貨又得；買個認沽期權，當幫股票買個保險又得，個市真係差咯，都可以預定沽貨價，將坐艇嘅貨沽出。

覺得敏妮一知半解唔識嘢信唔過？以下係好機會喇，「港股王」搵咗有好多資深期權投資者坐鎮嘅「期權教室」，合辦期權講座，深入淺出解釋點樣用股票期權、指數期權保障投資組合，兼賺取穩定回報，對期權唔了解又想知多啲嘅朋友最啱聽。

近嚟做到冇停手，連敏妮 blog都經常唔記得 update，周末得閒，趁機執執個 blog，發現有啲朋友留言俾敏妮。有位朋友問月供基金、月供股票，定係自己買股票好。單以回報計，當然係自己買股票好，但要冒嘅風險亦高，敏妮唔知呢位朋友對投資股票有幾認識，所以好難幫佢揀。

不過，對於冇信心、未夠功力、唔能夠承擔風險、本錢有限嘅散戶，月供係好選擇，至於基金定股票，敏妮揀股票，原因之前講過，唔再重複。

講到月供股票，敏妮起初月供滙控（ 005），中途轉供港交所（ 388），後來又轉番供滙控，一切都係隨市場情況而變。敏妮只係想講，唔好以為月供股票，揀定一隻之後就唔使理市場變化，市場上面冇嘢係永恒不變嘅。

受惠人民幣升值

就好似最近內地重新啟動人民幣滙率改革，大家對人民幣升值憧憬再次升溫，敏妮又會轉一轉月供嘅股票，由供滙控轉為供平保（ 2318）。人民幣升值要買內地保險股嘅原因，近排已經唔少分析員同財經名嘴解釋過，至於三保中揀平保原因，亦都唔使等敏妮執人口水尾。

喺考慮轉供平保前，敏妮都有諗過，好唔好學啱啱畢業出嚟做嘢時咁，走去做零存整付儲人民幣呢？敏妮仲好認真咁搜尋市面上有邊間銀行提供人民幣嘅零存整付。結果暫時淨係搵到交通銀行有，另外有一、兩間銀行就提供「零存」港幣，到特定時間就自動將存款轉做人民幣嘅服務，效果同零存整付差唔多。

雖然人仔零存整付較活期高息，但回報唔夠股票投資高，敏妮有一定「股」齡，亦可以承擔較高風險，選擇月供股票較適合。至於零存整付，就比較適合冇投資經驗，加上未有足夠錢投資嘅投資者。

星期一講開城中「雙李」，佢哋不約而同打開口牌，話增持旗下公司。睇港交所（ 388）大股東增減持資料，四叔同超人確係言出必行。敏妮以前都試過，統計超人李嘉誠增持長實（ 001）同和黃（ 013）嘅紀錄，發現超人往績甚佳，跟得過。今次興起，想睇吓四叔係咪一盞明燈。

自嘲「冒牌股神」，四叔李兆基增持紀錄冇超人咁多，睇番呢幾年，唔計上個月入市增持，似樣啲可以做統計分析嘅紀錄，包括 08年 4月初、 09年 1月初，同 09年 4月。其中 08年 4月 2日至 14日，四叔連續 8日，喺恒地（ 012）大概 57蚊左右增持，用咗大概 8.8億蚊增持 1527萬股。喺真金白銀力撐下，恒地的確俾四叔越買越升，但過咗一排股價就拾級而下，到年底先見底！之後一年雖然逐步回升，但頂多都係去番四叔增持時嘅位。不過，金融海嘯百年一遇，有 excuse。

再睇 09年 1月 12日至 30日嗰次，就啱啱相反，四叔越買股價越跌，而且增持規模都縮咗，用兩億幾銀分開 11日增持咗 700幾萬股，由差唔多 32蚊，買到最低 28.3蚊，結果恒地去到 3月 10日股價先觸底回升，踏上坦途。同年 4月 9號，四叔又開始增持，今次喺 30幾蚊水平， 8日內用唔夠 1億銀買咗約 270萬股，規模進一步縮小，可能係四叔見之前撈唔夠貨，所以喺市場掃番夠。

增持恒地有本錢有策略

撈唔到底並唔緊要，最緊要見升敢追，恒地嘅股價喺 09年 12月重上 60蚊高位，之前買嘅，一鋪返晒嚟。雖然四叔有買冇沽，升跌都只係賬面數，但佢有本錢又有策略，贏谷、輸縮，證明呢位「股神」唔算「冒牌」！