敏妮Talk

明年對一眾會考生嚟講，意義重大，因為佢哋將會參加「末代會考」。講得係末代，即係冇 take two，敏妮認識一位小妹妹就係應屆「末代會考生」，由於「要回頭」會很難，所以佢非常「揼本」，參加坊間某補習天王嘅會考補習班。

會考對於敏妮嚟講，已經係頗舊嘅回憶，不過聽呢位「末代會考生」講家陣嘅補習班，真係幾好賺。據小妹妹講，佢雖然報讀補習天王教嘅班，但從未見過天王真身，上堂只係睇電視播碟，原來天王將教材輯錄成光碟，每次上堂就係播碟。不過小妹妹仍然津津樂道話：「內容一啲都唔悶，會用動畫深入淺出講書本內容，啲動畫好靚 o架。」

即使見唔到天王真身，但據聞學費一啲都唔平，敏妮忍唔住衝口而出，「吓，播碟都收咁貴，包及格、包攞 A呀！」
點知「末代會考生」答：「係呀，你有得揀 o架，有保證攞 A嘅補習班，如果攞唔到 A，會退番一半錢。不過呢個保證攞 A嘅班，收得仲貴。另外有一個平啲嘅，係保證及格班，如果攞唔到 C級以上，又係退番一半錢。」

開包達標理財診療室

敏妮突然「魔鬼」上身，不如整個「包達到目標嘅理財診療室」，好似《理財版》嘅「理財診療室」咁，幫人度身訂做 portfolio，例如 10年儲千萬退休、 5年儲首期上車，既然包達標，當然唔會免費提供服務，但就包你達標，否則原銀奉還。試諗， run份 portfolio出嚟冇乜本錢。你想達到目標自己自然會努力，就算真係唔達標，甚至蝕錢，敏妮最多都係退番之前收嘅錢。最重要係，錢就一早收咗，就算日後要退還，中間嗰段日子，敏妮都收咗幾年息啦！

相信補習天王真係幫到唔少學生考到好成績，唔似敏妮咁市儈！

暑假又到，一啲朋友亦有問敏妮有乜嘢課程啱讀。以前敏妮都講過特許財務策劃師課程（ CFP）。不過，想利用暑假讀晒整個 CFP，時間就唔多夠。雖然係咁，敏妮都建議一啲已完成中學課程嘅朋友，以暑假為開始，報讀 CFP，因為敏妮認識好多大學生，都係趁讀大學時，順便讀埋呢個資格。 CFP課程其實唔係咁艱深，讀開書嘅年輕人，應該可以應付到，正所謂書到用時方恨少，你日後出嚟做嘢就知要兼顧讀書有幾辛苦。

書到用時方恨少

不過，可能受金融海嘯影響，敏妮同個教 CFP課程嘅講師傾開，佢話今年報讀 CFP嘅人少啲。敏妮冇收廣告費，唔係同 CFP做推廣，但財務管理喺現代社會，係不可或缺，如果你信經濟係一個循環，咁趁家陣冇人讀 CFP時去讀，到讀完之後，如果剛好經濟好轉，理財服務需求急增， CFP就會變得搶手。即使對讀完 CFP之後嘅出路有質疑，起碼課程對管理自己嘅財富都有好處。

海嘯過後趨吃香

除咗 CFP，敏妮噚日 check email，見到大學 sent咗啲新課程嘅資料嚟，其中有個課程敏妮覺得將會係繼 CFP之後，另一個好實用同有前景嘅科目。就係 Risk Management，同樣係因為金融海嘯，敏妮同咗金融界朋友傾偈，佢講笑話，家陣啲散戶投資者已經醒目咗好多，唔係咁易呃到佢嘅，好多嘢都會問有冇風險㗎，簡單啲講就係識得乜嘢係風險管理。散戶都尚者認識，何況大機構，尤其一場海嘯令大金融機構出事，所以敏妮相信，風險管理嚟緊將會好吃香。

前排有位讀者一明喺敏妮 Blog留言，佢係 F7學生，考完 A level，家陣遇上選科嘅煩惱。佢話之前睇敏妮 Talk，叫冇乜特別興趣嘅學生，讀金融相關科目，睇完之後，佢就更加有決心想讀 BBA（工商管理）。由於 BBA入面都有唔少科目揀，佢起初諗住揀金融同會計，但又覺得太多人讀，即使畢業競爭都好大，所以就諗好唔好讀 BBA加 Engineering。

會計是金融之本

關乎讀者前途問題，敏妮畀意見之前，問過位大學講師意見，佢話要視乎一明喺金融同數學呢兩瓣夠唔夠強，如果夠強的話，揀金融同會計較好，始終係一門專業，喺香港有一個專業資格傍身始終有啲保障。至於 BBA只係一般嘅學位， Engineering前景亦都只係一般。
好明顯，講師朋友都係建議一明揀金融同會計。其實敏妮都贊成，尤其係讀會計呢一科，因為只要係同金融經濟有關嘅嘢，講到尾都會同會計有關。所謂會計，就係搞掂盤數，細到一家蚊型公司會計文員，大到央行行長，最重要都係睇得掂，同搞好盤數。

拆解企業真面目

最近睇雜誌訪問國際會計權威《 Financial Shenanigans》作者 Howard Schilit，佢最撚手係拆解巨型企業修飾後嘅財務報表，喺訪問裏面佢講到，巨企嘅財務騙術萬變不離其宗，就係將公司真實嗰盤數、即係佢嘅財務狀況扭曲，等睇起嚟更切合管理層「需要」。
敏妮當然希望一明讀會計，有朝一日好似 Schilit咁，幫小投資者揭開企業嘅假面具。就算未達到 Howard Schilit咁深功力，正如講師朋友話齋，會計係一門專業，唔怕搵唔到食。再講，睇得通上市公司盤數，對於自己投資都有好處。

啱 啱 讀 完 咗 個 校 外 課 程 ， 考 完 試 一 刻 ， 敏 妮 成 個 人 輕 鬆 晒 。 自 從 出 嚟 做 嘢 ， 敏 妮 幾 乎 冇 停 過 讀 唔 同 嘅 課 程 ， 讀 埋 唔 少 diploma 。 好 多 同 事 都 會 奇 怪 ， 敏 妮 平 日 嘅 工 作 已 經 夠 忙 ， 點 解 仲 有 時 間 同 精 力 去 讀 書 ？ 上 天 好 公 平 ， 你 一 日 有 24 個 鐘 ， 敏 妮 一 日 都 係 得 24 個 鐘 ， 問 題 係 有 人 覺 得 工 作 壓 力 大 ， 一 放 工 就 唔 做 嘢 ， 將 啲 時 間 用 嚟 消 遣 。

公 餘 進 修 可 減 壓

敏 妮 一 樣 有 好 大 工 作 壓 力 ， 紓 緩 嘅 方 法 就 係 專 心 做 其 他 嘢 ， 忘 記 工 作 壓 力 ， 讀 書 係 迫 自 己 專 心 嘅 最 好 方 法 。 所 以 呢 個 校 外 課 程 完 結 咗 ， 敏 妮 又 開 始 搵 緊 另 一 個 課 程 ， 不 過 ， 前 排 同 股 壇 前 輩 傾 開 ， 佢 問 到 敏 妮 進 修 有 乜 得 着 時 ， 敏 妮 突 然 覺 得 ， 讀 埋 一 屋 diploma ， 只 係 有 理 論 基 礎 ， 唔 識 運 用 喺 工 作 同 生 活 上 面 ， 讀 咗 都 冇 用 。
敏 妮 開 始 明 白 ， 股 壇 前 輩 嘅 意 思 。 唔 少 人 都 好 似 敏 妮 咁 ， 為 咗 提 升 自 己 ， 又 或 者 職 業 需 要 ， 所 以 公 餘 去 進 修 ， 考 取 唔 同 嘅 專 業 資 格 ， 不 過 即 使 考 試 pass ， 究 竟 係 咪 真 係 對 提 升 自 己 嘅 專 業 水 平 有 好 處 呢 ？

股 壇 前 輩 舉 咗 個 例 子 ， 「 就 好 似 上 山 學 武 功 ， 你 的 確 係 學 咗 好 多 招 式 ， 單 睇 招 式 ， 你 可 能 仲 勁 過 我 ， 但 係 學 武 功 唔 可 以 只 係 得 招 式 ， 仲 要 配 合 內 功 心 法 ， 先 至 可 以 將 招 式 發 揮 出 嚟 。 」 齋 聽 的 確 好 玄 妙 ， 最 難 係 點 樣 實 踐 。

相 信 敏 妮 當 務 之 急 ， 唔 係 搵 另 一 個 課 程 報 讀 ， 而 係 將 手 上 面 學 咗 番 嚟 嘅 「 武 功 」 ， 融 會 貫 通 ， 嘗 試 喺 生 活 上 面 實 踐 。 如 果 唔 係 用 咗 咁 多 時 間 ， 花 咗 咁 多 心 機 去 進 修 ， 但 得 物 無 所 用 ， 最 後 盞 嘥 ！