敏妮Talk

股市同樓市真正走出谷底，唔少股壇朋友生猛番。不過股市距離高位仲有段路，眾多股票仍累積唔少蟹貨。敏妮之前提過一位朋友， 06、 07年開始投資，喺滙控（ 005）、宏利（ 945）成為「紅底股」時買入。家陣雖然股市升到見萬八，但佢兩隻愛股，一隻淨係識集資，一隻未有耐變返紅底股。提到佢個投資組合，只有一臉無奈。

善用衍生工具

莫講一般散戶投資組合有蟹貨，投資老手都會坐艇，面對一籮籮股蟹點算？衍生工具對好多朋友嚟講，如洪水猛獸，唔掂得，但只要當佢係一件「工具」，唔係當佢「賭具」，可以將你嘅蟹貨成本降低。
敏妮家陣月供滙控，但之前就供落唔少港交所（ 388），雖然港交所近排升勢唔錯，敏妮都快見家鄉，但敏妮認識一位朋友，喺港交所百六蚊時買，有排未返家鄉。話晒揸藍籌，叫佢沽實唔捨得，但等返百六蚊都仲有一段時間。

收期權金當利息

其實有股票喺手，收股息之餘，仲可以收吓另類「利息」，敏妮講嘅係透過沽出期權收期權金。喺期權投資裏面，有所謂 covered call options，透過沽出一個認購期權俾人，收期權金，如果股價跌時，期權金袋袋平安，如果真係升到期權行使價嘅位，就將手上嘅股票俾人。
當然，如果你本來就唔想將啲股票俾人，你可以搵個高啲嘅行使價，但收期權金會少啲。敏妮係保守派，所以行使價唔會放得好貼市價，但亦唔會無雷公咁遠，因為冇肉食。不過期權有一個好處，就係可以平倉轉倉，所以敏妮會不時住個價，見好貼時就轉倉。如是者，有時可能收晒成份期權金，有時可能只得微利，但每月持續為投資組合裏面嘅蟹貨做期權，當收息，就可以將蟹貨嘅成本降低，好過等運到。

前排有位讀者一明喺敏妮 Blog留言，佢係 F7學生，考完 A level，家陣遇上選科嘅煩惱。佢話之前睇敏妮 Talk，叫冇乜特別興趣嘅學生，讀金融相關科目，睇完之後，佢就更加有決心想讀 BBA（工商管理）。由於 BBA入面都有唔少科目揀，佢起初諗住揀金融同會計，但又覺得太多人讀，即使畢業競爭都好大，所以就諗好唔好讀 BBA加 Engineering。

會計是金融之本

關乎讀者前途問題，敏妮畀意見之前，問過位大學講師意見，佢話要視乎一明喺金融同數學呢兩瓣夠唔夠強，如果夠強的話，揀金融同會計較好，始終係一門專業，喺香港有一個專業資格傍身始終有啲保障。至於 BBA只係一般嘅學位， Engineering前景亦都只係一般。
好明顯，講師朋友都係建議一明揀金融同會計。其實敏妮都贊成，尤其係讀會計呢一科，因為只要係同金融經濟有關嘅嘢，講到尾都會同會計有關。所謂會計，就係搞掂盤數，細到一家蚊型公司會計文員，大到央行行長，最重要都係睇得掂，同搞好盤數。

拆解企業真面目

最近睇雜誌訪問國際會計權威《 Financial Shenanigans》作者 Howard Schilit，佢最撚手係拆解巨型企業修飾後嘅財務報表，喺訪問裏面佢講到，巨企嘅財務騙術萬變不離其宗，就係將公司真實嗰盤數、即係佢嘅財務狀況扭曲，等睇起嚟更切合管理層「需要」。
敏妮當然希望一明讀會計，有朝一日好似 Schilit咁，幫小投資者揭開企業嘅假面具。就算未達到 Howard Schilit咁深功力，正如講師朋友話齋，會計係一門專業，唔怕搵唔到食。再講，睇得通上市公司盤數，對於自己投資都有好處。

前嗰排，同事慳妹 sent咗個網上討論區嘅內容俾敏妮睇，仲同敏妮講，「如果我係個男仔，一定速撇！」原來有位網友喺討論區呻，話佢同女友，一個住九龍灣，一個住葵芳，大家都冇乜事業基礎，月薪都係萬鬆啲蚊，兩個人打算結婚，男方諗住婚後同屋企人住，慳番啲，點知個女仔就要有自己嘅天地，結果兩口子傾掂數，租樓住。

孭樓債　為住得體面

本來都無乜問題，但有日個女仔話為男方預備咗個拍拖「新節目」，就係去元朗某樓盤睇樓，話就話係拍拖節目，但一去到個盤，個女仔就猛話要買，男方計晒數，即使上車盤賣百零萬，但佢哋連首期都唔夠，日後供樓負擔亦都會好重，點知女仔話：「做九成半按揭咪得囉！你諗吓，日後招呼朋友返屋企坐都體面啲啦！」
睇到呢度，身為女性嘅敏妮都同慳妹一樣，叫個男仔快啲撇咗個女友。

無論市好市壞，經常都有人問好唔好買樓？單喺投資角度，除非你係資深炒家，否則炒股贏錢機會同回報，好多時都高過炒樓。不過敏妮都曾經叫過人買樓，原因係敏妮認識一個人，係典型名牌奴隸，佢搵錢唔少，但就花費喺名牌衣履上面，甚至去到不能自拔嘅情況。佢同敏妮講，自己唔識投資，亦唔想花時間學，但如果冇人逼佢投資，啲錢會拎去買埋名牌，所以佢問敏妮有乜投資理財方法。

藉供樓　逼自己儲錢

當時敏妮叫佢月供股票，又喺 97金融風暴、樓市大跌後，叫佢買層樓供，雖然買樓時未算係沙士低位，但家都幾難跌番去佢當年買嗰個價。更重要係，供咗咁多年，佢已經供甩層樓，家陣手上除咗有層樓，仲有唔少藍籌股票，唔係好似以前咁，只係得一屋名牌。

雖然好多財務策劃師都會勸客人唔好孭到一身債，尤其長年期嘅樓債就更要三思，以上兩個例子，正係最 typical嘅正反例子。

上個禮拜，敏妮用心理遊戲為題，講生活裏面成日要面對好多人事，點知有朋友話俾敏妮誤導咗，以為真係有心理測驗玩。心理測驗呢啲玩意，敏妮隨手都搵到幾個同大家分享。

香港係一個機會主義者嘅天堂，你唔一定要係名牌大學畢業，只要你一技傍身就有機會發達，以往都有唔少例子，好似識睇風水或者跳拉丁舞好叻。不過有一技傍身又唔等於一定會賺大錢，之前喺網站見到一個咁嘅題目，相信好多香港人都想知，就係「你有冇本事賺大錢？」

股市活躍咪掛住玩

想知答案好簡單，心理測驗問題係，如果你同另外 3個朋友一齊搭的士，你會揀邊個位坐？答案有 4個，分別係前排司機隔離，後排右、後排中，同後排左。根據網站答案，揀司機隔離嘅人，好理智、夠鎮定，識得遵守市場規律，唔會做錯誤判斷。如果遇到生意麻煩，亦會理智選擇放棄，重新搵過生意目標。簡單嚟講，即係有本事賺大錢。至於揀後排右邊嘅人，做事細心，唔會對突發危機毫無準備。講到最唔適合做生意，係揀坐後排中間位嘅人，因為呢種人好脆弱，唔能夠承受亦唔識處理生意危機。揀後排左邊嘅人通常自以為是，唔識得審時度勢，亦唔啱做生意。

發現自己冇本事賺大錢？唔使扁嘴！敏妮認為呢個心理測驗唔準，試問有幾多富豪會坐司機隔離？不過敏妮相信，如果你玩呢個心理測驗，你賺大錢嘅本事會減少，因為你將時間用嚟玩心理測驗，減少咗自我增值嘅時間。唔抵！
有位股壇前輩講笑話，「家陣個市已經返到雞犬排隊準備炒上嘅時候，講得盡啲，晨早起身㩒吓十大升幅、十大成交，邊隻仲有水位都可以博吓」，連港交所（ 388）都變番紅底股，就知個市已經返咗嚟，你仲掛住玩心理測驗？

前嗰排放假喺屋企，睇咗個電視訪問節目，嘉賓係天文台前台長林超英。佢話，同天文台一班同事員工一直覺得，大家作為科學專才，只需顧住科學數據，客觀計算同預測天氣就已經稱職，但現實並唔係。

話說每當風雲色變，就會有好多市民打電話入去，有啲人問可唔可以早啲掛八號風球，咁就唔使返工，有啲人就叫佢咪咁快掛八號風球住，因為可能造成經濟損失。究竟天文台長同天文台專家，會 stick to科學計算出嚟嘅數據，定係聽取香港市民嘅心聲？

睇形勢勿做數據奴隸

上個禮拜睇《金手指》，孫柏文講到美林經濟師 David Rosenberg喺離開美林時，留低 13條做預測應該要謹記嘅嘢，當中有一條係「千祈唔好做數據奴隸，冇嘢勝過有智慧咁睇番個大環境同趨勢。」
的確做預測，夠客觀最重要，但只係睇數據，唔理現實環境又唔得。

數據係死嘅，人係生，搵人去處理啲數據，就係要靈活應變，否則可以用電腦 set晒啲程式，符合條件就自動掛風球。問題係人心難掌握，難怪林超英亦話，天上風雲固然難測，但地上人事更難測。

機關算盡惟人心難測

套用喺投資市場同職場，道理一樣，唔少投資專家分析時都會參考好多數據，但偏偏股市係一場心理遊戲，就好似美銀配售建行（ 939）咁，據聞中方搵咗啲唔會出貨嘅基金接美銀手貨，保障建行唔會俾接貨嘅人狂掟，機關算盡，結果噚日睇報道，一樣有接貨嘅人轉手沽貨賺成千銀。

辦公室政治更加係人性戰場，本來條數好易計，每個人將心力用喺工作上，業務做得好，大家都有利，偏偏每個人心中都有自己個算盤，心力用咗喺另一地方。

前幾日上網睇中央電視台一個訪問節目，呢個節目吸引嘅地方係，訪問股神畢菲特。 15分鐘嘅訪問，央視分兩集播出，係就係有啲「水份」，但股神嘅表現卻係異常精采，敏妮睇完不忘將條 link， email俾一眾好朋友大家一齊分享。

有冇諗過當畢菲特企喺你面前，你又得 15分鐘時間，你會問佢乜嘢問題？畢菲特信奉價值投資法，相信唔會有太多人「大嘥」到問佢攞冧巴，呢啲問隔離投資版一眾名家仲好。敏妮相信除咗會問畢菲特點睇全球經濟前景、佢手上嘅股票會幾時放、佢家陣想投資邊間公司嘅股票等問題之外，有一個問題都有唔少人想問，就係佢點樣投資？

捉得太緊乜都冇

畢菲特亦一如所料，苦口婆心同大家講，投資係睇長線，投資一隻股票，講緊唔係一日或者一個禮拜，而係好幾十年，甚至好幾代。不過，畢菲特喺訪問裏面仲留咗句說話送畀各位投資者，就係：「 You try to give it away and it comes back to you, if you hold on to it tight, you don't have any.」

有朋友睇完訪問之後，問敏妮呢句說話嘅意思，當然敏妮朋友唔係唔識英文，只係覺得呢句說話講你肯放手，佢反而會返嚟你身邊，但你捉得佢太緊，到頭來可能乜都冇，意思係叫人唔好執着，但價值投資法本身就係執着。執着於一隻股票、一家公司嘅分析，認為冇睇錯嘅話，就擇善固執，咁咪同畢菲特所講嘅有矛盾？

唔好執着眼前利潤

敏妮唔係股神，只可以估畢菲特說話嘅含意。敏妮估，畢菲特所講嘅係唔好執着眼前嘅利潤，有時放棄面前利益，日後反而賺到更多，但太過顧住眼前嘅賺蝕，沽咗或者唔止蝕，到頭來可能連渣都冇。

甚少有時間睇電視嘅敏妮，前幾日要清年假，可以偷得浮生半日閒，喺屋企睇電視，咁啱有機會睇到鄧萃雯嘅訪問。本來一個藝人嘅訪問冇乜特別，但佢提到自己返大陸拍劇嘅經驗，敏妮就認為，佢嘅工作態度好值得學習。

要求與付出非正比

香港人好多時面對內地同胞時，都覺得自己有份優越感。鄧萃雯話自己返大陸做嘢，要求嘅報酬同福利，都比內地演員高好多。其實唔講鄧萃雯已經係甚有名氣嘅演員，敏妮聽過好多初出茅盧嘅大學生，提到返大陸做嘢，佢哋嘅要求都比大陸人高。要求高原因唔一定係同交嘅貨有關，原因可能係「來自香港」呢個品牌，相信唔少人不知不覺間都會認為，單係呢個品牌都應該有一定 premium。

當然敏妮欣賞鄧萃雯唔係因為佢善用 premium，反而係佢冇加上呢個因素。佢話內地唔少演員都係學院派，個個都有本事，佢作為香港演員，要求報酬咁高，更加要交足貨，唔好俾人覺得你只係識要求，但冇料到，咁樣會影響日後香港演員嘅「品牌」。

盡力保護個人品牌

的確，好多人要求高係一回事，自己交嘅貨未必同「要求」成正比，好多時要求 100蚊，交嘅貨只係值 80蚊，甚至更低，當時可能係賺咗，但做壞咗自己個名，之前嘅 premium就會越嚟越收窄，最後可能要有 discount人哋先搵你。同樣嘅工作態度，放喺任何行業、職位都啱用。

其實唔一定開公司做生意，一般打工仔都有自己個「品牌」──就係佢本人，做嘢唔好單係為交差，最緊要記住做乜嘢都係為自己個「品牌」而做，到日後你老闆想升人，或者你自己想轉工跳槽時，就知呢個「品牌」有幾重要。

近排睇一啲投資專欄，唔少之前睇淡嘅前輩都開始改口風，當然個市都升到破完萬六再破萬七，家陣先確認股市轉勢，繼之而入市，難免要高追。

前幾日好多隻熊證被「啪」，身邊唔少朋友都話牛市已經重臨！究竟係咪真？都係嗰句，往往都係過後先可以確認。

不過牛市嚟大家自然搵到食，但即使牛市未嚟，都應該隨時準備，等隻「牛」嚟嘅時候可以把握到嘛！

忌怕錯失機會高追

睇《華爾街日報》有篇文章── Rules for Investing in the Next Bull Market（下一次牛市的投資法則），裏面提及到嘅 12條法則，綜合嚟講都係叫大家唔好怕錯失機會而去高追，或者警剔大家好容易有羊群心態，雖然用唔同字眼、唔同標題，但只要記得嗰張「心電圖」，基本上就可以概括了解作者想講乜。

不過呢篇文章唔係冇可讀性，其中提到一點，敏妮就覺得幾受用。

作者提醒讀者，市場係群體行動，所有人都買嘅時候，股市自然會升，當大家都掟貨時，股市自然會跌。
係就係有啲「阿媽係女人」嘅感覺，但正如作者所講，當大家都喺度估緊市場趨勢嘅時候，實際上只係追逐緊鏡入面自己嘅倒影。

市場係群體行動

當然自己嘅倒影固然難捉，但作者似乎忽略咗，喺金融市場裏面，任何活動都總有個「始作俑者」，偏偏通常都係大戶先行，散戶後跟，散戶往往追逐緊嘅，唔係鏡入面自己嘅倒影，而係大戶嘅倒影，都幾悲！

前日提到職業 blogger可以靠寫 blog維生，其實網上財路真係好多，睇你有冇創意去發掘。幾年前，契大佬 Kenny曾經同敏妮傾過一盤生意，係參考內地一個叫「威客」嘅網站。
喺大陸最多同最重要嘅資源就係人，所以各方面嘅人才都不缺。呢個威客網站嘅營運模式，就係作為一個中介人，提供一個平台俾啲需要人幫手嘅「僱主」，將工作放上網，而瀏覽呢個網嘅人就可以睇吓自己有冇能力 take呢個 job嘞。

質疑營運模式存漏洞

由於一切喺網上交收，所以大部份嘅工作都係繙譯、平面設計咁。雖然話大陸除咗賊之外，好多嘢都係假，但呢個網運作都有好幾年，家陣都繼續存在，應該唔會假得去邊。
敏妮對網上世界冇乜認識，但問過公司啲小妹妹，佢哋都覺得好新奇兼好有諗頭，但就質疑呢個營運模式 work唔 work？會唔會做完嘢嗰個人唔畀錢？又或者畀咗錢會唔會收唔到貨？

威客網提供交易平台

敏妮未試過喺網上接 job或者搵人幫手，所以唔識答，不過敏妮反而有一個諗法。其實喺香港好多財務策劃師都係「寄居」喺保險公司或者銀行，幫呢啲機構嘅客人提供服務，由於係「寄居」性質，所以經常俾人質疑佢哋唔夠獨立，如果有一日喺香港出現呢類「威客」網站，有需要嘅朋友就可以將自己嘅財務情況，同財務目標放上網，等啲財務策劃師提供建議，如果個建議獲採用，就有酌情報酬，對部份朋友嚟講，可能都幾受用。
當然，敏妮咁樣講唔係準備用敏妮 Talk嚟搵食，所以之前留言俾敏妮問問題嘅朋友，敏妮樂意免費效勞嘅！

敏妮最近睇《華爾街日報》一篇文章很感興趣，當然能叫敏妮感興趣是因為這篇文章講點樣搵「 money」。篇文章題為「 America's Newest Profession: Bloggers for Hire（美國最新職業：博客作者）」，對於每個禮拜寫 3篇敏妮 Talk嘅敏妮嚟講，對於呢個話題又點會唔感興趣。

美 45萬人寫 blog維生

據篇文章所引述嘅研究，美國 Bloggers超過 2000萬人，其中 170萬人可以透過寫 blog賺錢， 45.2萬人更加係以寫 blog作為主要收入來源。敏妮個 blog曾經都有收過廣告，但由於敏妮喺 blog度提過網上廣告呢個話題，所以未收到廣告費就已經俾廣告商以違反規例為由，冇得玩。雖然之後都有人提出俾錢轉載敏妮嘅文章，但敏妮船頭驚鬼、船尾驚賊，唔知對方真正意圖，所以婉拒咗。
對於美國有咁多人可以靠寫 blog作為主要收入來源，敏妮最感興趣當然係佢哋嘅 business model。講到尾又係靠廣告，正如文章作者所講，幾乎冇博客係可以靠讀者訂閱賺錢，收入係依靠網上廣告，如果讀者 click網上嘅廣告， blogger就有錢袋。

寫手年薪 35萬銀

營運模式似乎同敏妮初初諗住「大展舉腳」時冇乜分別，不過，原來家陣寫 blog爭取廣告仲有其他方法賺錢。可能由於美國市場大， blogger真係可以有嚟自廣告嘅收入，道理同經營電視台或者報紙雜誌差唔多，收視高，當然會吸引廣告商，所以有啲 blog為咗吸引更多讀者，會俾錢請 blogger寫稿，據文章講，呢啲專門幫人寫 blog嘅作家寫手，通常有 4.5萬至 9萬蚊美金年薪，即係 35萬至 70萬港幣年薪。
唔知呢個「風氣」幾時先吹嚟香港，等敏妮可以賺番啲外快呢！