敏妮Talk

上個禮拜，敏妮話正計劃將月供返嚟嘅港交所（ 388）沽出，原因係深信上海的確會成為國際金融中心，即使中國咁大可以容納多過一個金融中心，但上海始終係「血統」純正，所謂親疏有別。

正如敏妮上次講，好多人都認為，上海硬件設備已達國際水平，但人才、法制等軟件，同香港仍有一段距離。究竟呢個距離係咪咁大？股壇前輩有另外嘅睇法，敏妮認為好值得參考。

有錢搵自然吸引資金

股壇前輩舉咗一個地方做例子，就係日本。日本喺亞太區嚟講，係首屈一指先進國家，早已趕及歐美國家，單睇寄信時，寄去日本嘅郵費係同寄去歐美一樣，仲有好多時基金或者投資產品，當講亞洲區時都會講「日本除外」。

不過講到「軟件」方面，日本人整體嘅英文水平唔使敏妮多講，試諗一個連溝通都有問題嘅地方，居然可以追英趕美，經濟起飛，金融市場發展蓬勃，原因好簡單，就係投資者相信，去呢個地方可以搵到錢。

配套會逐步配合

股壇前輩問咗一個問題，「敏妮，家陣最搵到錢嘅地方係邊度？」相信呢個答案大家都心中有數。只要一個地方有錢賺，就會吸引資金。當然會否如股壇前輩所講，當一個地方有資金流入，經濟蓬勃，當地嘅法制自然會逐步配合，暫時仲係未知數，但有錢賺嘅地方就會吸引 smart money，作為國際金融中心最重要就係吸引到資金流入。
諗真吓，香港之所以吸引外國投資者，唔通單靠法制完善、人才滙聚？

講到尾，都係因為香港背靠中國，係大陸對外嘅窗口。如果中央銳意將上海打造成國際金融中心，誰說不可能？

敏妮有好一陣子唔敢喺呢個欄度講股票，一來驚又俾 Mr. B話敏妮變咗一盞明燈──講親嘅股票都跌！
敏妮只月供過兩隻股票，除咗滙控（ 005），其間亦曾經供過港交所（ 388），當時敏妮月供嘅原因係，中央一再強調會保持香港國際金融中心嘅地位，而港交所喺香港係獨市，點計前景都非常秀麗，所以每個月不斷儲港交所。

上海急起直追

舊年年中，由於港股直通車未開通先摺埋，敏妮開始對港交所有啲動搖，但仍然堅持繼續持有供番嚟嘅港交所，直至最近，敏妮開始想沽出港交所……
近排好多炒股嘅朋友都同敏妮講，個市似係風雨欲來（敏妮想沽港交所唔係呢個原因），就喺呢個時候， Mr. B都估大市會回吐，但佢同敏妮講，想趁大市回吐買港交所。敏妮當時問咗佢一個問題：「你唔怕滬港之爭咩？上海要做國際金融中心噃！」 Mr. B嘅回應同好多人諗法一樣，「香港有完善嘅法制，上海好難追到。」

香港只係「太傅」

同樣嘅問題，敏妮都同 Uncle Ray傾過，佢都認為香港仲有大把世界，上海有排追唔上，佢喺自己個欄度都提出過好多質疑，莫講話法制，單係人民幣未開放，就已經阻住上海進軍國際金融舞台。
的確，單計硬件，上海好快可以躋身國際前列，輸只係輸在軟件，而呢啲軟件正係香港嘅優勢，不過敏妮既然諗住沽港交所，當然係信上海會成為國際金融中心，而香港嘅角色，頂多同上海並駕齊驅，更大可能係成為「太傅」，幫助上海呢個「真命天子」。
點解敏妮咁諗？下次再講。

寄報稅表嘅截止日期雖然過咗，但如果喺網上報稅，就仲未算遲，所以近排仍然有唔少朋友問有關報稅嘅問題。理財版日日都有稅務信箱，日日都有專家長駐候教。其實類似嘅信箱，好多傳媒都有，不過敏妮都睇過有啲專家嘅回覆，有啲個答案似乎唔係咁準確。

稅務問題複雜難明

講真香港唔少市民要交稅，多人做嘅嘢理應好簡單，好容易理解，偏偏呢個世界就係咁矛盾，就好似日日都有咁多散戶炒股票，但偏偏股票市場運作就絕不簡單。講番報稅，好多人都要報稅交稅，偏偏稅務條例就複雜到你唔信。敏妮唔係齋噏，單睇舊年 CFP嘅稅務考試統計， 842人考，及格率得 43%，一半人都冇。
莫講話一般市民對稅務唔係咁掌握，其實好多專家，都未必 100%掌握稅例。稅局係就係提供咗好多資料，仲喺自己個網頁整咗唔少 Q& A諗住深入淺出，幫市民解決疑難，點知越幫越忙。好似之前一位退休嘅公務員朋友問，佢份退休金使唔使報稅，有專家答要報稅，但實際上除非係退休後仍每月支取長俸，否則公務員一筆過退休金，係唔使報稅。

公務員長俸要納稅

不過專家咁答又有佢道理，因為稅局提供咗本報稅指南，的確係話「入息包括來自受僱工作（全職、兼職或散工形式）、擔任任何職位或收取前僱主的退休金」，即係所有人收到嘅退休金都要交稅。慳妹見到敏妮咁講，睇吓本報稅指南，都覺得專家有理，為咗解開呢個「謎」，佢打電話去稅局問。
稅局嗰邊回應話，為咗做一本「 user friendly」嘅指南，所以只係概括同簡短咁列出一般條例，適合一般大眾，佢仲話一般公務員都知道，一筆過嘅退休金唔使納稅。
敏妮突然諗起，唔知嗰班賣雷曼迷債畀公公婆婆嘅銀行，係咪都係咁諗，「一般人都知道，要有高回報，當然要承受高風險，所以冇講得咁詳細畀佢哋聽囉！」

大市由低位回升到家陣，都有好一陣子時間，對於後市，敏妮認識一啲朋友都話，嚟緊應該會有一個「好似樣」嘅調整。至於係幾時，當然冇人知。不過敏妮就趁呢段時間，為自己嘅 portfolio做個定期檢討。
好多財務策劃師都建議，每個人都應該經常檢視吓自己嘅 portfolio。市況波動時，掛住實個市，大升時，個個都爭取時間搵銀，邊得閒理嗰啲陳年舊貨，除非啲陳年「艇貨」終於見岸，就會趁機清貨。相反，大跌時，顧住哭股喪，亦都冇心機執吓自己個投資組合。

調整前檢討投資組合

講番敏妮檢視自己個 portfolio，就見到有好多一手手嘅股票，都係前嗰幾年市旺，新股抽親都有得賺時，抽番嚟嘅。大部份都係內銀股，同之前比較，都冇潛水貨，但得嗰一手，就算沽出套現，都賺得唔多，所以敏妮一直冇沽到。
其實冇跌穿招股價，又有息收，就算繼續揸落去都冇壞，但諗清楚條數可能唔係咁計。首先由於敏妮將啲貨存喺股票行，雖然佢哋冇收存倉費，但每次收息都要收手續費，股息回報即時打折扣。仲有係，雖然話得一手貨唔係壓住好多資金，但敏妮個 portfolio裏面類似嘅「一手貨」都有好幾隻，前排炒 sector，一早起身見邊個 sector當炒，將呢啲「一手股」集腋成裘用嚟跟一轉，收穫都應該唔差。

趁當炒沽出「一手股」

當然投機炒賣，唔係傳統理財之道，但敏妮想講係，點樣將啲被壓嘅資金用得有效率啲，爭取更大嘅回報。當然敏妮唔係叫你翻箱倒篋，將啲長揸嘅股票套現用嚟短炒，但如 portfolio裏面有啲你認為食之無味，棄之可惜嘅投資，不妨 check吓可唔可以善用，令佢更有價值。

暑假又到，一啲朋友亦有問敏妮有乜嘢課程啱讀。以前敏妮都講過特許財務策劃師課程（ CFP）。不過，想利用暑假讀晒整個 CFP，時間就唔多夠。雖然係咁，敏妮都建議一啲已完成中學課程嘅朋友，以暑假為開始，報讀 CFP，因為敏妮認識好多大學生，都係趁讀大學時，順便讀埋呢個資格。 CFP課程其實唔係咁艱深，讀開書嘅年輕人，應該可以應付到，正所謂書到用時方恨少，你日後出嚟做嘢就知要兼顧讀書有幾辛苦。

書到用時方恨少

不過，可能受金融海嘯影響，敏妮同個教 CFP課程嘅講師傾開，佢話今年報讀 CFP嘅人少啲。敏妮冇收廣告費，唔係同 CFP做推廣，但財務管理喺現代社會，係不可或缺，如果你信經濟係一個循環，咁趁家陣冇人讀 CFP時去讀，到讀完之後，如果剛好經濟好轉，理財服務需求急增， CFP就會變得搶手。即使對讀完 CFP之後嘅出路有質疑，起碼課程對管理自己嘅財富都有好處。

海嘯過後趨吃香

除咗 CFP，敏妮噚日 check email，見到大學 sent咗啲新課程嘅資料嚟，其中有個課程敏妮覺得將會係繼 CFP之後，另一個好實用同有前景嘅科目。就係 Risk Management，同樣係因為金融海嘯，敏妮同咗金融界朋友傾偈，佢講笑話，家陣啲散戶投資者已經醒目咗好多，唔係咁易呃到佢嘅，好多嘢都會問有冇風險㗎，簡單啲講就係識得乜嘢係風險管理。散戶都尚者認識，何況大機構，尤其一場海嘯令大金融機構出事，所以敏妮相信，風險管理嚟緊將會好吃香。

銀行存款利息咁低，所以每次同朋友傾偈，敏妮一定會問佢有乜投資路數。前幾日同個數口好精朋友食晏，敏妮又問佢近排有乜好投資。佢話前排有做股票掛票據（ELN），雖然家陣收息冇金融海嘯前咁高，但息率仍然吸引，但近排銀行推銷ELN唔係好多，所以最近已冇投資ELN。

ELN息率仍吸引

ELN點樣玩，理財版都講過唔少，不過佢講到家陣市場上面冇乜ELN，敏妮都好認同。先唔講由於雷曼迷債事件，令到銀行職員勁sell投資產品場面冇以前咁盛，即使睇報紙都好似少呢類投資產品廣告。至於收息冇以前咁吸引，敏妮起初以為係同股市未升到好似前年咁瘋狂有關。不過同光頭仔傾開，佢金融界朋友話佢知，市場少ELN產品，同產品回報率唔及以前，可能都係同莊家唔同有關。

以前出ELN主力都係投資銀行，普羅市民銀行買見到ELN，都係銀行代理產品。由於雷曼迷債事件，令大家醒覺到，原來交易對手有事，會搞到銀行一身蟻。與其幫人做不如自己搞，據光頭仔講，家陣銀行自己出ELN，但考慮到風險因素，而且銀行做生意進取得都相當審慎，所以ELN息率會冇投資銀行定出咁有競爭力。

銀行做生意趨審慎

當然光頭仔講敏妮未證實，但若真係如佢所言，敏妮就可以解釋到，原來近排市場少ELN產品，而推出ELN息率又點解冇以前咁吸引，原來唔係因為投資者唔敢買。其實投資者都係善忘，只要有錢賺，之前傷痛可以好快好番。不過，敏妮都同位投行做開衍生產品朋友傾過，佢話家陣後市有人睇好，有人睇淡，投資都係小心「接貨」危機好。

同事轉寄咗個朋友嘅難題叫敏妮睇吓有乜建議，呢位朋友廿來歲，佢爸爸月入萬幾蚊，媽媽係主婦，細妹讀緊書。據呢位朋友講，除咗爸爸會畀家用，佢每個月都畀 3500蚊屋企，一家人生活費只係啱啱夠用。
呢位朋友對未來好有預算，佢話細妹畢業出嚟工作，假設都好似佢咁每個月畀 3500蚊家用，加埋爸爸嘅收入，屋企整體收入應該好鬆動。問題係佢同妹妹結婚後，好難再畀家用屋企，如果爸爸退休，父母冇儲蓄，退休生活唔知點算。

收入月月清無閒錢儲蓄

首先敏妮唔知呢位朋友屋企每月使費？妹妹幾時出嚟做嘢？爸爸仲有幾耐退休？佢同妹妹仲有幾耐唔再可以供養父母？由於欠缺好多資料，好難畀到實際建議。
呢位朋友話，家陣單係佢同爸爸嘅收入都夠屋企用，妹妹日後提供嘅家用可以全數儲起。不過據佢估計，「鬆動」日子只得一兩年，就以佢妹妹畀 3500蚊家用全數儲起嚟計，假設 1年有 10厘回報，月儲 3500蚊，兩年計都係得 9.3萬蚊，莫講話父母退休生活顧唔到， 1年嘅使費都好緊絀。

父延遲退休　母做兼職助開源

好多財務顧問都會講，應該早啲開始理財計劃，因為越早開始，你就越輕鬆同越易達到目標。不過睇番呢個朋友嘅例子，有能力邊個唔想早開始。
敏妮覺得，凡事固然要盡力而為，但更要懂得面對現實。可以嘅話，爸爸延遲退休，妹妹可以自己照顧自己，由佢負責部份家務，媽媽做兼職增加家庭收入，呢啲都係辦法。當然如果呢位朋友中咗六合彩，一切會易啲解決，可惜一般人似乎唔係咁易遇到有錢喺天跌落嚟嘅幸運！中國有一句俗語「馬死落地行」，與其呻冇辦法，不如積極面對。

婆媳間最易有拗撬，何況相見好，同住難，一齊住嘅就更加多爭執。敏妮「幸好」尚未嫁得出，冇呢個煩惱，但有個朋友，就夾喺太太同媽媽之間，變磨心。

呢位朋友成日要往返香港同廣州 office，但為咗一對孖仔，幾辛苦都會趕返香港，唔留喺廣州公司安排嘅宿舍過夜。本來工作已經夠疲累，但返嚟香港仲要解決太太同媽媽嘅爭拗，所以佢得閒就會搵敏妮出嚟呻。

前幾日敏妮見到個為人新抱嘅網友留言，覺得好精警，所以 sent咗畀呢位朋友睇。網友留言太長，敏妮只摘錄幾句「(1)你是你媽生的，所以你媽對你好是天生應該的。你老婆是你老婆媽媽生的，你老婆對你好，不是天生應該的。(2)你媽生你的時候，千辛萬苦，死去活來，那是你爸造成的，所以你爸理應對你媽、也就是你爸爸兒子的媽媽好。你老婆以後給你生孩子，千辛萬苦，死去活來，那是你造成的，所以你理應對你老婆，也就是你兒子的媽媽好。」
最「狠」的一句是，「無論你怎麼做，你媽永遠都是你媽。如果你對你老婆不好、你會永遠失去你老婆。」

有商有量關係佳

正所謂家和萬事興，敏妮都認識有一對婆媳， friend到不得了，佢哋關係咁好，都係因為一個錢字。新抱一直有投資理財，即使全職做主婦，都有留意同研究邊啲投資產品值得投資。至於佢奶奶就成日去銀行，炒吓股仔，做吓定存。本來一對婆媳相處好「客氣」，但某次奶奶俾銀行職員 sell佢某隻金融產品，話好似一般定存，但就收到高啲息，奶奶心郁郁諗住返屋企問個仔，點知新抱見到啲介紹小冊子，由頭到尾睇完之後，同奶奶講回報高，但風險仲高，買唔過！結果奶奶冇買到。

至於嗰隻產品係乜，唔使敏妮講喇啩。

公司同事 sent咗個喺討論區睇到嘅故事俾敏妮，叫敏妮俾啲意見。個故事係關於一對夫婦，老婆不滿現狀，喺討論區留言，希望得到認同。話說老婆賺錢比老公多，但老婆認為男人嘅天職就係照顧家庭、照顧妻子，對於生活開支「 AA」制好唔滿意。
嗰位太太話：「我老公覺得我有工作，有收入，一個家庭大家有份。他表示我不是全職主婦，不應俾家用我，也不須要給我錢。不過他又不想佔我便宜，所以開支一人一半，結婚買樓供樓連首期都是。」據嗰位太太補充，由於自己唔夠錢，所以最後都要老公出多幾萬做首期。

供樓、買零食樣樣計

除咗大數目要計，呢位太太仲話，就連日常瑣碎開支，都要共同承擔，佢哋兩人整咗個共同「基金」，老公出六成，太太負責俾四成，出街食飯一係老公俾，一係基金出，就連買零食都斤斤計較，究竟係基金出錢定各自俾錢買自己想買嘅零食。
作為女性，敏妮本來都覺得應該支持吓呢位太太，但佢老公又唔係冇道理。先唔計邊個賺錢多，敏妮成日都強調不論男女，財政獨立好重要。雖然話夫婦間吓吓講錢會傷感情，但數目分明的確可以免除日後一啲拗撬。就好似以上個故事嗰位老公，買樓前講明，由於供樓佢出六成，所以一早已講明日後賣樓，要分番樓價六成。

無論男女　應留私房錢

其實太太有怨氣，敏妮作為女性都好明白，有邊個唔想嫁個有錢人，生活無憂？不過敏妮覺得最重要唔係邊個出錢，而係要做好夫婦間嘅理財計劃，當中包括如果有子女嘅教育同生活費，又或者未來退休計劃，甚至係為對方提供保障等，當大家都有共同理財目標，再共同努力，無謂嘅爭拗自然可以減少。
不過，共同承擔係一回事，敏妮都同意「傳統智慧」，無論男女都應該留番一啲私房錢，始終有啲嘢講唔埋，為自己留後路，係對自己嘅保障。

成日都話「一寸光陰一寸金」，所以要善用時間，但究竟點先算善用時間呢？敏妮前排睇咗篇外國文章，都係講善用時間，敏妮覺得好精采，想同大家分享。
作者觀察到一個情況，就係好多人嫌嘥時間，所以寧願喺街買份三文治，都唔會喺屋企自己整。一份三文治 6美金，如果喺屋企整，大概要 5分鐘。換言之用 6美金嚟買 5分鐘時間。如果化為一個鐘計算，就係 72美金。作者話，如果選擇自己整三文治，即係慳到 72美金，而慳落嚟嘅錢仲唔使交稅。

7蚊買 5分鐘時間

當然條數有啲嘢遺漏咗，例如自己做三文治都要成本。敏妮覺得精采嘅係，作者將每一樣嘢都算一算賬。就用番上面嘅例子，香港一份三文治賣 13蚊左右，自己喺屋企做成本大概要 6蚊，需時 5分鐘左右，扣除成本，即係用 7蚊買 5分鐘時間，以一個鐘頭計就係 84蚊。以一日 9粒鐘，一個星期返 5日，一個月有 4個星期計，即係一個月做 180個鐘，以時薪 84蚊計，月入就係 15120蚊。

一寸光陰一寸金失效

如果你月薪冇萬五蚊，或者時薪冇 84蚊，咁按道理你就應該自己喺屋企整三文治嘞，因為你賺番嚟都唔夠嘥！喺好景時，好多人都唔介意用錢買時間，正如好多朋友嘅口頭禪，「上落一轉都搵番啦！」文章嘅作者都有提到呢個問題，佢話如果將每個潛在機會都換做時薪計一計，就可以一目了然係咪值得用錢買時間。
不過，今時今日，當某些人喺度搵嘢做填塞時間，時間又似乎唔係咁值錢，可能「一寸光陰一寸金」呢句說話唔係好適合呢個年代！

敏妮今天沒有文章在報章刊登，俗務纏身，亦未能與一班心中仍有一團火的同志同行，在這小小的地盤留言．

二十年前的今天，不會忘記！

上個禮拜敏妮過咗個長周末假期，搵埋契大佬 Kenny、因念同埋 Uncle Ray出嚟飲 tea，大家由六四約唔約埋一齊出嚟上街，到好唔好換個部 iphone，乜都講得一餐。

打官腔都要溫文爾雅

講到善用時間呢個話題，大家不約而同認為，最嘥時間係玩「辦公室政治」呢個遊戲。不過嘥時間還嘥時間，置身商業社會，有啲嘢唔係你唔想玩就可以置身事外。 Uncle Ray喺投資銀行做咗好多年高層，對慣一班嚟自世界各地嘅同事，講到玩「辦公室政治」佢最耍家。敏妮叫 Uncle Ray露兩手見識吓，兼用嚟傍身。
Uncle Ray推薦咗本書叫《 Yes Prime Minister》，佢話自己有好多「手段」都係喺呢本書學番嚟。
敏妮一聽到佢話呢本書已經心領神會，因為呢本書係講一名英國政務官，點樣好有技巧咁，令常務秘書長唔去搞改革，唔會煩到公務員。英國人一向講求風度，即使玩「政治」、打官腔，都要溫文爾雅。

係 remove唔係 fire

至於點樣學以致用？ Uncle Ray話，對於唔滿意嘅下屬，佢從來唔會喺大老闆面前，面紅耳熱話要炒某人，「我從來唔會用 fire呢個字，只會用 remove（調動）。」當老闆問調去邊？佢會答：「 depends（你決定）啦！不過暫時未有 suitable嘅位。」咁講其實同炒魷冇分別，但就相當得體，起碼聽起上嚟唔係佢要炒人，只係嗰位人兄唔多啱使，暫時冇適合嘅工作安排畀佢。
可能有人覺得打管腔好煩厭，但做人圓滑啲，未嘗唔係打工仔生存之道。

滙豐銀行將紅簿仔利息，由已經接近零息再進一步減到更接近零，的確單就字面睇，利率大減九成，但實際上只係由存 10萬蚊收 10蚊息降到得 1蚊，存 100萬收 100蚊息降到收 10蚊。諗真啲你有 100萬閒錢放喺銀行，唔搵地方投資，只係因為出面太過亂，所以寧願蝕息好過連本都輸埋啫！
不過，家陣個市穩定番，但又未至炒到瘋狂，所以敏妮有幾個朋友四處搵啲具投資價值嘅項目。

慳息慳管理費

最近有個朋友搵緊啲 100萬樓下嘅市區舊樓，諗住買嚟收租。呢個價錢可以搵到嘅選擇唔多，但問過位地產代理朋友，佢話旺角、油麻地、太子都有。搵 100萬樓下嘅樓，原因純粹係佢畀得起，因為舊樓銀行通常唔係咁願意借錢，而且唔使承造按揭，可以慳番利息開支。至於揀市區樓係因為交通方便，可以吸引租客。再加上舊樓管理費通常亦會平啲，你知家陣出租單位通常都係全包宴，慳利息慳管理費，利潤就大啲。
朋友呢個如意算盤，的確可以打得響，一間裝修企理嘅市區舊樓，要收幾厘回報應該唔難。敏妮起初聽落都覺得可行，但諗諗吓又覺得風險唔細，首先出租物業，最麻煩係租客質素。敏妮唔係怕遇到租霸，因為聽代理朋友講，啲租霸立心唔交租，所以要租樓，都唔會吼呢類幾千蚊租嘅舊區舊樓，吼都吼新淨企理質素更高嘅樓嚟租。諗真不無道理！

代理寧益熟客

敏妮擔心從事非法行業嘅人，會租呢類市區舊樓「做生意」咁就麻煩。鍾意買舊樓收租嘅 Auntie方同敏妮講，要喺舊區買舊樓收租，除非你對嗰區認識好深，兼且同嗰區嘅代理相熟，否則唔好諗住計掂條數就「盲目」去買，有筍盤好租客，代理都留畀自己熟客啦，幾時輪到你。