敏妮Talk

前日中港兩隻超級新股上市，認購反應熱爆，但不約而同，多位股壇前輩都同敏妮講，「星期三實反高潮。」薑果然係老嘅辣！其中有個前輩同敏妮講，一早見勢色唔對，沽晒手上抽到嘅金隅（ 2009）。佢所謂嘅「勢色唔對」，係指金隅首日開市價，低過暗盤價。

前輩話近嚟上市嘅新股，好少開市唔到暗盤價，金隅居然開唔到口好價，要沽！星期三埋單計數，前輩的確有佢嘅道理，金隅雖然首日冇跌穿招股價，但最後連 10蚊都保唔住，同其他新股王相比，係遜色咗啲。

不過用開市到唔到暗盤價嚟衡量，又未必次次都準。就以近期 6隻新股做個統計，除咗金隅，霸王（ 1338）同秦發（ 866）都開唔到暗盤價，尤其係秦發，首日高位都唔到暗盤價，但之後佢哋嘅表現都相當見得人。相反， 361度（ 1361）首日開市就係暗盤價，但首日見完個高位後，家陣都未見番當日個高位。金隅命運如何，會唔會好似霸王同秦發咁，有待分曉。

內地首日追買新股多要蝕

同樣係新股爆炒潮，大陸情況比香港更瘋狂，前日睇內地有段分析文章，講到大陸新股「首日爆炒」，全拜新股上市首日無漲跌幅限制規則造成，文章引述市場人士分析，「新股不敗」唔係因上市公司錯估招股價，而係一啲參與新股申購嘅機構，利用新股上市首日無漲跌幅限制嘅規則，瘋狂抬高股價，然後利用第二日開始嘅跌幅限制，逐步出貨。
文章仲引述咗深交所嘅研究，話 91年至今年 6月，投資者喺新股上市首日追入並持有一段時間後賣出，損手可能性絕大多數情況下高達 60%。 07至 08年仲高達 80%至 90%。

好彩香港炒股冇咁多規限，炒新股出事機會減少，更重要可能係好似一位前輩講，「大陸炒股仲有咁多規則，暫時都未能趕及香港，做國際金融中心。」

敏妮認識唔少精於理財嘅朋友，不約而同話，如果有人問佢哋買樓定租樓好，佢哋會傾向租樓。奇怪嘅係，佢哋大部份自己都係業主，買咗樓！

敏妮最近睇到《華爾街日報》一篇專欄文章，可能解釋到呢個怪現象。文章以《 Home Ownership Was Never A Road To Riches》為題，作者因經常轉換工作地點，為咗屋企人住得安穩啲，所以買樓，寧願搬屋時賣咗佢。佢計算自己買樓賣樓嘅收入，係用賣價減買價同裝修加埋維修成本， 91年至舊年夏天平均投資回報有 3.5厘，但舊年夏天買嗰層就冇咁好回報。不過，佢覺得冇買錯樓，因為佢認為買樓最大價值唔係在於升值，而係在於能住，同時唔使畀本來必須要畀嘅租金，再者，供樓按變相逼佢儲蓄。

買樓當然最好有升值潛力，升值潛力要睇 location，最好係豪宅。相反必需品最緊要啱心水，正如作者所講，當買樓係從自己嘅實際需要出發，你就會發現，超出實際需要嘅樓並唔係投資，而係浪費，就好似租間不必要嘅豪宅，你可以有咁嘅選擇，但喺財務上並不明智。

金隅都係早沽早着

同場加映：

前日講過金隅（ 2009）嘅追揸沽策略，千算萬算，敏妮後嚟發現算漏一項。上個禮拜有單新聞唔知大家有冇留意？話說國務院喺金融海嘯後，公佈咗十大振興產業規劃，當中包括水泥業。不過內地企業見好唔識收，搞到工信部狠批話佢哋盲目擴產，搞到產能過剩。大陸有報章引述發改委嘅消息話，可能會喺 8月出招調控水泥產能。

金隅做乜？冇錯，北京最大水泥生產商！所以提醒抽到金隅嘅幸運兒，早沽早着，你可能為錯過高位揼心，敏妮亦曾錯過志高（ 449）首日高位，好彩後會有期，但唔係隻隻都咁好彩。

放假前寫抽金隅（ 2009）攻略，有數得計，逾 40萬人入「細飛」嘅話，果然做唔到一人一手。玩熱爆新股，第一步係博抽到，下一步就要諗幾時沽？圖表派對於冇圖睇嘅新股，寧願唔炒，亦有前輩照樣靠睇圖，但短啲，睇開市後十幾分鐘，敏妮就寧願捉心理。

成日聽人講，「隻股票貨源歸邊，有得炒。」相反貨源廣泛，好難維持秩序，一有錢賺，大家就爭相沽貨獲利，尤其多數投資者都係揸 1手貨，抱住賺餐晏嘅心態。截稿前金隅仲未出分配基準，唔知幾多人揸 1手貨，但相信唔少。

07年係新股最當旺嘅年代，敏妮就以當年熱爆新股做例，阿里巴巴（ 1688）有 56.6萬人申請，超額認購 256倍，抽 20手先穩得 1手，揸 1手嘅散戶近 15萬，佔認購人數 26%。隻股暗盤已經升逾八成，一眾名嘴呼籲散戶首日好沽，但近 38萬人入飛抽唔到，佔認購人數 67%，所以有人沽亦有人肯接火棒，結果首日上市最高爆升 1.96倍，翌日見埋歷史高位。如果你見有 15萬個同你一樣揸 1手貨嘅人，兼隻股升近兩倍都有人肯接火棒，唔走實後悔。

倘首日無爆升　再等一會

另一隻中鐵（ 390）， 75.9萬人入飛，又係抽 20手先穩得 1手，廿萬散戶揸 1手。比起阿里巴巴，上市時間僅差一個月， 20萬人嘅沽壓應該重過 15萬人，但 46萬抽唔到嘅散戶只係佔認購人數六成，加上中鐵暗盤價只係升得兩成，叫沽嘅聲音亦冇乜，頭嗰幾日升幅唔算好勁，但 1個月後已經見歷史高位，升逾 1倍。

以統計嚟講，兩個樣本嘅結果唔可以做結論，但熱爆新股似乎都好快見高位。兩個例子中，敏妮會參考中鐵嘅例子，一來保薦人都係瑞銀同摩根大通， 1手中籤比率又係 10%，唔等錢使，如果見金隅首日升唔多，即管等多陣。

公司慳妹同敏妮講咗個故事。話說佢朋友間公司嚟咗個新同事，喺試用期間，表現卓越，朋友老闆當然深慶得人。不過試用期滿，朋友同事就現出真本性──未試過有一個星期返足工，每個星期總有一兩日要攞病假。

家陣失業率咁高，唔通佢唔怕俾人炒？據講呢位朋友同事做 sales，最緊要開到單，佢會趁返工嘅時候，打電話 call客，做夠數開夠單就算，至於後勤工作佢就懶理，要身邊嘅同事 suffer。

攞盡所有福利

不過最令敏妮拍案叫絕係，據慳妹講，朋友同事早喺搵工時已經有部署，就係專揀大機構，仲查埋呢啲機構嘅福利，包括一年最多可以攞幾多日病假、醫療保障有幾多等，目的係攞盡所有嘅福利。當然呢啲員工好易東窗事發，所以佢喺過往幾年，幾乎一年轉一份工。由於 sales經常轉工好平常，所以佢可以繼續（對佢自己嚟講）好 efficient嘅工作生涯。

聽完呢個故事，敏妮記得曾經睇過一本叫《乖女孩賺不到大錢》嘅書，裏面係講喺日常工作裏面，女性經常做出錯誤嘅決定，令自己致富步伐比男性慢。書裏面不斷提醒 OL，要善用公司資源，兼提升工作效率。

單單聽慳妹所講，敏妮相信呢位朋友嘅同事係一個好 smart嘅 OL，已經做到書裏面嘅建議，而且仲有過之而無不及。不過如果能夠更好運用佢嘅「才能」，可能得着更多。

敏妮都諗住抽金隅（ 2009），但抱住買六合彩心態，所以只係抽一手。

其實用呢個「戰術」嘅散戶，最希望一人起碼有一手。不過投資銀行設分配基準時，有唔同嘅考慮。不過，有時分配基準亦都受客觀環境所影響，以金隅為例，究竟做唔做到一人一手，要睇好多因素，但首先係夠唔夠分？

單以股票行借出嘅孖展金額超過 900億銀嚟計，超額倍數已經過百倍，根據分配機制，如果超額 100倍或以上，就將公開發售嘅股份由 9333.4萬股，增加到 4.67億股。不過，抽過新股嘅都大概會知有所謂嘅「細飛」同「大飛」之分，以認購額 500萬蚊嚟做分水嶺， 500萬蚊樓下嘅就係「細飛」，屬甲組；相反就係「大飛」，屬乙組。 4.67億股金隅新股會平均分俾呢兩組，即係每組有 2.3億股，各自按認購情況分配。

一般情況底下，絕大部份散戶都只會入細飛，所以屬甲組。 2.3億股即係 46.7萬手貨，要一人起碼有一手，除非甲組認購人數唔多過 40萬，否則都幾難一人一手。幾十萬人申請並唔誇張，記唔記得 06年 10月工行（ 1398）招股，結果有近 100萬人申請。

近期有個新樓盤開售，成為公司同事新話題，原因係呢個盤不斷推出「誘客」策略，由首年零利息，到承造九成半按揭本來要買按揭保險，但發展商旗下嘅按揭中介公司倒貼保費。
上次已經計過所謂嘅首年免息，不如折現畀現金回贈仲實際。至於零保費，雖然由按揭公司倒貼，但七成以上按揭嗰部份嘅息率收 P（最優惠利率），喺家陣銀行鬥減按息嘅時勢，係十分高嘅按息。根據按揭證券公司嘅按揭保險計劃，一次過付清保費，承造九成半按揭，保費係貸款額 3.38%， 400萬銀層樓，即係按揭借 380萬蚊，保費大概 12.8萬蚊。

首年免息不如現金回贈

不過，單計七成以上按揭嗰部份，供 20年， 5.25厘息，全期按息開支超過 38萬，如果可以跟七成按揭嘅息睇齊，家陣市場按息可以低到 2.15厘，供 20年，全期按息開支 23萬左右，相差 15萬。
慳番大概 13萬保費，但按息就要畀多 15萬，相差兩萬蚊。呢個零保費按揭計劃，標榜冇罰息期，咁買家係咪可以享受咗零保費之後轉按呢？唔罰息，係咪代表唔罰手續費呢？敏妮問過，但未有答案！

零保費或吸引手緊人士

無論有冇咁着數，畀你享受完零保費，可以拍拍屁股轉去第二間銀行享受低按息，但正如公司同事慳妹講，對於真係唔夠首期又想買樓嘅人，除非搵屋企人幫手，否則要湊夠首期，可能要靠私人貸款，但市場上要搵 5.25厘嘅私貸息率又似乎好難，所以對於嗰啲手緊嘅人，呢個按揭計劃真係幾吸引。
問題亦喺呢度，唔夠首期，即係你未夠本錢去買樓，勉強透過孭債達到目的，變相加重未來嘅財務負擔，何必呢？地產商要賣樓，為你開方便之門，但冇人叫你一定要落叠。

前兩日公司同事同敏妮講咗個故事，話說佢朋友見八達通自動增值好方便，所以就去某大銀行申請呢個服務。同事朋友搞掂晒啲手續，諗住張八達通到時到候會自動增值，點知唔 work，佢於是打電話去問銀行職員，得出嚟嘅答案認真出人意表。

位職員同佢講，張八達通第一次要負夠 35蚊先至識得自動增值。同事朋友唔知點樣可以控制到，第一次負到 35蚊，個問題係，佢張卡嗰陣負咗兩蚊，已經唔可以再負嘞。同事就幫朋友諗咗個解決方法，叫佢用現金入噃啲錢入張八達通度，然後計好數，再用嘟卡買嘢。不過都唔成功，後來同事朋友終於解開個謎，原來係要銀行出封信俾佢，拎去港鐵站辦手續，先可以啟動自動增值服務。

送積分息事寧人

咁點解開頭位銀行熱線職員會有咁嘅答覆，同事朋友於是再致電銀行熱線，今次嘅答案係，根據銀行內部條款指引同推廣。同事朋友不憤呢個指引，於是向銀行有關方面投訴，結果銀行息事寧人，送咗兩萬分信用卡積分俾佢，仲同佢講唔知個職員點解咁講。

敏妮要重申，呢個唔係笑話，係真人真事

噚日睇報紙，見到一單地產新聞，話發展商夥銀行推優惠，首年免按揭息，啲息由銀行負責。發展商話呢個優惠可以吸引到換樓客。公司唔少同事見到呢單新聞，都質疑有冇人會為咗第一年供樓唔使畀息，就走去換樓。
究竟第一年免息有幾吸引呢？敏妮即管計吓，就以呢個優惠提供嘅樓按計劃做例子，首三年 HIBOR（香港銀行同業拆息）加 0%，以廣告提供嘅 1個月 HIBOR係 0.1%計算，一個 432萬蚊嘅單位，供 20年，第一年嘅利息開支係 2500蚊左右，扣咗呢 2500蚊，供 20年全期利息開支超過 85萬蚊。

銀行回贈當免息

畀着你，會唔會因為慳 2500蚊，而孭幾百萬債？除非你一直諗住買層樓嚟炒，又驚樓市唔就，閒閒哋要坐貨一年半載，咁首年免息，可以慳番啲坐貨成本，咁又講得過去。
不過，嗰個樓盤嘅管理費每呎要成兩個幾，一個 600方呎單位，要成千幾蚊一個月，慳返嚟嘅首年供樓利息，都唔夠畀兩個月管理費。
可能呢個「優惠」太吸引，公司慳妹唔係有心買樓，都打電話去銀行問吓個 plan，點知一問之下，原來「優惠」真係唔可以睇表面。據慳妹講，所謂嘅首年供樓利息由銀行負責，其實係銀行提供回贈，至於金額就係貸款額 0.1%。

回贈不跟隨 HIBOR升

眉精眼企嘅你應該識計數，點解佢哋舉例時 1個月 HIBOR係 0.1%？咪就係因為回贈 0.1%，咁計落咪係零息囉！如果 HIBOR升，回贈又唔會跟隨升噃，咁即係唔係真正零息喇！
千祈唔好諗「逢商必奸」，只係買層樓咁大嘅投資，打個電話去銀行問清楚個 plan，計吓數先決定，都唔係好高要求啫。

醫學越嚟越昌明，加埋家陣好多人都希望可以早啲退休，所以退休後可以享受人生嘅歲月越嚟越長。
當然，可唔可以享受，就睇你準備咗幾多退休本錢。如果有兩隻針對退休嘅投資產品，一隻畀到你 30年，每年 1萬蚊美金保證回報，另一隻產品保證回報同樣係 1萬蚊美金，但就無限期，總之保到你百年歸老，養你過世。
得 30年回報嗰隻投資金額當然少啲，至於另外嗰隻無限期回報保證，當然收得貴啲啦，不過你認為應該貴幾多呢？
如果只係貴 1萬蚊美金，你會揀得 30年保證回報嗰隻產品，抑或無限年期嗰隻呢？

複利威力勿忽視

簡單邏輯推論，只要退休生活多過 30年，就算只係多 1年，揀無限期嗰隻產品都已經平手，之後淨賺！如果敏妮係投資產品嘅 sales，知道個客對複利威力冇認識，用呢個方法推銷，都幾有把握 sell到個客買貴嘢。
其實用簡單嘅財務計算方法，假設投資回報係 10厘，以複利計算， 30年每年收 1萬蚊美金嗰隻產品，家陣應該值 10.4萬美金，至於無限期嗰隻家陣只係值 11萬美金，相差 6000蚊美金左右。
換言之，敏妮真係賣得出隻產品，就多賺你 4000蚊美金?!

年金產品的原理

其實市面上好多年金產品，用嘅都係同一原理，你以為越長命就收得越多錢，產品供應商會蝕畀你？
錯晒！每一隻投資產品推出前，都會有專人計過數，邊得嚟咁多優惠益顧客吖，最多都係賺你少啲當多謝支持。

前幾日收到中銀職員嘅電話，起初以為係 sell基金保險信用卡優惠，後來先知今次係 sell東亞中國嘅人民幣債券。敏妮第一時間諗，唔通隻人債唔受歡迎，搞到要靠銀行硬銷？噚日再收到話東亞為咗方便客戶認購人債，延長旗下分行嘅服務時間，就令敏妮更加有疑問？

受歡迎程度受質疑

敏妮舊年喺人民幣勁升，大家搶住返大陸做人民幣定存時，都諗住叫契大佬 Kenny同敏妮一齊返大陸開戶，後嚟恒生銀行提供一條龍服務，敏妮就透過香港嘅恒生，開咗個大陸嘅恒生戶口，諗住將一直放喺中銀嘅人民幣，滙返去做人民幣定存收高啲息。後嚟人民幣升勢放緩，敏妮嘅人民幣就冇郁過嘞！
不過，香港嘅人民幣存款有幾多息，唔使敏妮多講，睇吓理財版右下角嘅利息表都知，所以當敏妮聽到中銀職員推銷時話，「小姐，你反正放人民幣喺度都係得咁少利息，買東亞隻人債有兩厘八利息，高好多噃！」

投資組合要有人民幣

正如噚日波 sir李兆波講，家陣抽新股好過買人債，好似今日掛牌嘅琥珀，噚日暗盤價最高去過 2.45蚊，收市報 2.26蚊，比招股價高 36%。當然要攞成百萬蚊先保證抽到一手貨，成本唔輕。另一個要考慮嘅係，債券同股票始終係兩項風險唔同嘅投資產品，喺敏妮個 portfolio裏面，股票佔唔少，當然新股都會抽，但就未有債券呢項投資產品。
究竟敏妮使唔使買番啲債券，平衡吓個 portfolio呢？敏妮之前唔投資債券，一來係因為自覺仲係年輕，可以承受較高風險，另一原因係債券喺香港好似唔係咁流行。
不過，既然敏妮認為投資組合裏面有必要持有一啲人民幣，反正本身都有啲人民幣存款，暫時又唔想擰返大陸做定存，咁買人債收高少少息都係一個唔錯嘅選擇。

一個 30幾歲、學歷只得中五畢業嘅人，做咗 15年文職，經驗老到，但至今仍然只係一個普通文職，你覺得佢嘅前景會係點呢？敏妮答案係──前景堪虞。
有位朋友將一個網上討論區嘅內容 email畀敏妮，裏面提到一位網友喺網上問，「 30幾歲人， F5畢業加 15年文職經驗，係咪玩完？」據佢再提供嘅資料，呢位朋友精通電腦 MS Office，英文良好，家陣做嘅係入電腦、出單等工作嘅普通文職。

長江後浪推前浪

對於一個初出茅廬嘅中五畢業生，有呢位網友嘅搵食伎倆，啱啱出嚟做嘢只係做個普通文員，並唔係乜嘢事。不過如果做咗 15年都仍然做同一個位，只有一個原因，就係佢冇自我提升、自我增值。先唔好提長江後浪推前浪，淨係計吓數，打咗份工 15年，即使表現幾差，敏妮相信老闆唔炒你嘅話，點都會按通脹係咁易加啲人工畀你，就當入職起薪點 5000蚊計，每年加 3%， 15年計落，家陣都應該有 7560蚊個月，即係年薪逾 9萬蚊。
前排有單新聞，講副學士嘅年薪，最低嗰間院校出嘅副學士畢業生，年薪得 8萬蚊。如果你係老闆，又遇着經濟差，一街畢業生人浮於事，你估你會點做？

為自己留後路

當然 15年工作經驗都係一個優勢，但 15年做嘅都係入電腦同出單之類嘅工作，呢個經驗似乎又唔係咁值得提。年資、學歷、表現對打工仔嚟講都好重要，但更重要係一份危機感。敏妮記得，以前講股票投資時都講過，投資最緊要為自己準備一道逃生門，方便勢色不對時有逃走嘅機會。打工仔亦都需要為自己安排一道逃生門─一條後路。
好多理財專家會建議打工仔喺積蓄中，預備應急錢，除咗錢之外，更有用係搵食嘅技能，而呢項技能更需與時並進，為自己增加競爭力。

月供基金股票越嚟越普遍，敏妮喺網上經常見到有朋友問，究竟供基金好，抑或供股票好？呢個問題真係冇答案，因為兩者並唔係 apple to apple，好難比較。月供產品本身嘅成本已經唔低，就以月供股票為例，每次買都要收手續費、交易徵費，加上牽涉碎股，成本當然會高過整手買賣。至於基金本身要收管理費、認購費，比股票收費會更高。

自動轉賬被多扣錢

講開收費，敏妮就見到個網友喺網上呻，話無端端俾人收雙倍費用。據佢講，已經連續 3個月俾基金公司收 double錢，第一次係因為轉咗 payment方法，所以要收 charge，至於之後兩次就純粹係間公司出錯。網友質疑係咪間基金公司博亂乘機扣多錢。敏妮唔知佢幫襯邊間基金公司，遇到呢啲情況最好就係先打電話去證監會投訴，再同嗰間基金公司理論。
由於呢位網友係用銀行自動轉賬，所以有其他網友質疑，點解無論收幾多錢，間銀行都照幫個客畀。其實銀行只係一個中介服務機構，客人選擇用自動轉賬，銀行收到賬單咪照喺客戶個戶口度扣賬，幫佢找數囉，就好似你用自動轉賬支付手提電話賬單、公用服務賬單咁，銀行都係照單幫你找數。

設定上限仍有風險

覺得咁樣好冇保障，其實銀行客戶可以為自動轉賬嘅賬戶設定一個限額，如果賬單過咗限額就唔過數，不過就有一個風險，因為如果你張賬單真係過咗限額，銀行過唔到數，會收你手續費，仲有，由於過唔到數，你嘅「債主」收唔到自動轉賬金額，可能會罰你錢。
敏妮都認識一啲朋友，為咗方便所以用自動轉賬，以為一勞永逸，點知遇到唔老實嘅商戶，方便變麻煩。

上次敏妮講到正計劃沽出港交所（ 388），講得有計劃，當然係有部署咁做，唔係話沽就沽。首先由於啲港交所係透過月供股票儲嘅，所以要計一計每股嘅成本。

敏妮由 07年 7月初開始逐個月儲，到舊年 8月停供，唔計零頭、唔計手續費交易費，一共供咗 19個月，每月 5000蚊，合共供咗 9萬蚊。由於股價有起有跌，敏妮 check番，以每個月 10號嘅收市價計，港交所股價由最低 70蚊，至最高差唔多 250蚊。好概括咁計，大概供咗 770股，每股平均 116蚊。

沽售前先計成本

喺計每股成本嘅時候，敏妮順便回顧吓供港交所嘅往績，敏妮喺港交所仲係 80幾蚊時開始供，當中曾經上過逾 250蚊，好彩時間唔係好耐，唔會拉高敏妮月供港交所嘅平均成本。

有咗呢個做指標，敏妮就知只要港交所喺 116蚊樓上，敏妮都唔使輸。噚日曾經去過 124.3蚊，收報 120.6蚊，跌咗 1毫，如果噚日沽出，以收市價計，敏妮每股賺 4.6蚊，賬面賺 3500蚊左右。不過，一來敏妮沽貨行動尚未進行，何況用咗年幾嚟儲，唔計收嘅股息，都只係賺嗰幾千蚊，加埋時間成本，認真唔化算。

其實月供股票策略係長揸，數數手指，敏妮 07年開始收集，到家陣準備沽出，計埋都唔夠兩年時間，點計都唔算係長線投資。不過敏妮冇諗住等，有時睇錯股，或者投資策略做錯咗，最緊要認錯，重整策略。

敏妮經常聽股壇前輩講，投資世界好現實，因為個個投資者都係真金白銀投入，所以千祈唔好講感情，亦唔好死撐，見隻股份質素有變，就要轉軚，邊個叫香港有好大可能唔再係祖國領土下唯一嘅國際金融中心，再講如果上交所嚟香港掛牌，敏妮一定會考慮月供上交所。