敏妮Talk

明天就踏入 9月份， 9月係一個多事嘅月份， 01年有 911事件，舊年嘅 9月 15號就有百年老號雷曼兄弟申請破產。雷曼事件除咗掀起金融海嘯，更令一班唔能夠承受高風險嘅投資者，發現自己個 portfolio裏面，原來有名叫「迷你債券」嘅結構性產品。

仲有 15日就係雷曼破產一周年，香港嘅雷曼迷債苦主，上過街、示過威，的確可以迫使到部份金融機構就範，賠錢平息風波。講開賠錢息事寧人，前幾日敏妮同位 CFP師姐食晏，講開銀行又再大量招聘個人理財顧問，之前因為金融海嘯，搞到無人讀嘅金融學、經濟學同 CFP，嚟緊應該又受歡迎。

其實好多人都知，銀行為業績要賣產品，銀行前線員工唔少要孭 quota，至於投資者亦都唔見得對自己嘅投資負責任，所以唔知自己買乜，只係想知自己可以賺幾多。不過一場金融海嘯，令呢班投資者學精咗，自創一套安全投資法。

購多人買產品

聽師姐講，自從迷債事件，有幾家金融機構為咗息事寧人，願意賠錢同啲客和解，一班「精明」投資者就學精咗點樣揀投資產品。佢哋唔會再好似以前咁，淨係問隻產品有幾多厘回報，係咪保本，穩唔穩陣，反而首先會問，隻產品多唔多人買？

咁樣問嘅原因，唔係想知隻產品係咪好受市場歡迎，而係要知，隻產品出事時，多唔多苦主一齊上街，夠唔夠群眾壓力可以逼政府做嘢！

聽完之後敏妮拍手叫絕，亦倒抽一口凉氣。同時為銷售呢啲產品嘅金融機構，同香港國際金融中心嘅地位擔心，試諗諗，商業社會買賣雙方有一紙合約為憑，買賣細則條款都有白紙黑字寫明，但金融機構為咗彌補銷售手法失誤作出嘅補償，反而鼓勵個別投資者以群眾壓力保護自己權益，而唔係循正途透過增加自己嘅投資知識，保障自己，真係嗚呼哀哉！

次講到敏妮嘅健身教練，資金唔多想學投資，希望有人畀啲意見。其實啱啱出嚟做嘢嘅年輕人，都有類似問題，就係資金唔多，但想投資。敏妮提議教練月供股票，因為敏妮亦是由積少成多開始自己的理財投資。

前排一班同事開會，有位啱啱入職嘅同事問敏妮，「我雖然啱啱出嚟做嘢，都好想有一日可以自己買層樓，但敏妮你都知我幾錢人工，都唔知儲到幾時先夠首期？」敏妮上司聽到之後，有感而發話，自己啱啱出嚟做嘢時，起薪點同家陣嘅後生仔差唔多，但係佢後生時嘅樓價，同家陣就好大分別，家陣後生仔想買樓，除非屋企人幫手，否則單靠自己能力，都幾吃力。

敏妮同意有屋企人幫好重要，但自己都要有基本嘅本錢。敏妮啱啱出嚟做嘢嗰陣，已故嘅外公同敏妮講，「敏妮，呢個世界要『錢』搵『錢』，先至可以將財富滾大，你要致富，就要捱到第一 嚿本錢，之後就用呢 嚿本嚟投資。」敏妮好記得外公嘅說話，但份糧得雞碎咁多，點樣先搵到第一 嚿本錢呢？好彩當時利率冇家陣咁低，加上雖然未識投資，但識得點慳點儲錢，所以啱啱出嚟做嘢時，用零存整付嘅方式，用咗幾年時間，儲咗人生第一個 10萬蚊。

以「零存整付」心態投資

有咗呢筆本錢，就開始學買股票，學錢搵錢，學嘢當然要交學費， 10萬蚊有部份蝕咗，部份不斷滾存累積，成為咗其後同家人合資買樓嘅本錢。

隨住工作經驗累積，薪金增加，加上銀行利息少得可憐，敏妮「零存整付」嘅唔再係現金，而係股票。家陣滙控（ 005）股價雖然不再風光，但一手都要三萬幾蚊，對於一般年輕人嚟講，一下子未必攞得出。當然有咗第一 嚿本錢，可以直接一整手股票買，但敏妮同時亦繼續用零存整付嘅心態，慢慢儲到一整手，善價而沽，套現換碼，令自己嘅 portfolio不斷擴展。

積少成多，聚沙成塔，係好簡單嘅投資理財方法，對年輕人嚟講，理財亦應該由簡單開始。

敏妮嘅健身教練某日問，有乜好投資建議？佢冇投資經驗，預計每個月儲千幾蚊。敏妮二話不說叫佢月供股票，佢咁後生，即使遇到市況逆轉，亦有大把時間追番，可以承擔較高風險。

不過敏妮同佢講，儲蓄最緊要嘅唔係諗用乜方法，而係先定目標。就以教練為例，敏妮呢頭同佢講完可以月供股票，佢已經問係咪儲到咁上下，見股價升就沽咗佢獲利！有咁嘅反應係因為佢儲蓄冇特定目標，所以見有盈利就沽出股票。唔係話月供股票就一定要長揸，敏妮自己都計劃股市炒到癲時，沽咗月供嘅港交所（ 388）。問題係，敏妮套現後會有後着，但相信教練應該冇。

定下目標易長期作戰

先確立目標，最大原因係令理財計劃可支持落去，試諗吓如果毫無目標，就會因一時市況上升，獲利後亂咁消費，將儲蓄返嚟嘅錢都使埋。不過對於好多年輕人嚟講，真係冇乜目標，尤其同家人住，每個月只要畀少少錢做家用，就可以大安旨意食屋企、住屋企，剩咗嘅錢自己使。

教練女友啱啱去外國讀書，兩年後先返，佢暫冇結婚計劃，亦無置業打算，問佢有乜目標，佢諗唔到！財務策劃師遇到呢啲客都咪話唔企喺度，惟有向佢 sell保險。不過佢係敏妮教練，敏妮先係佢個客，所以唔使向佢硬銷啲乜。
人無遠慮必有近憂，理財目標其實就係解決呢啲遠慮同近憂。暫時冇諗結婚置業，但唔係以後都冇呢個計劃，既然佢每月可以儲嘅金額唔多，就更加需要將戰線拉長。以複息計算，每月儲 1000蚊，每年回報 9厘， 10年有 19萬蚊。如果只得 5年時間，同樣月儲 1000蚊，要有超過 40厘回報先有 19萬蚊，否則就要月供超過 2500蚊，先有 19萬蚊。

攤長嚟儲，月供可以少啲、輕鬆啲，好過到有需要時先嚟儲，得幾年時間準備，到時負擔重，仲可能要承擔更高嘅風險。

滙豐話要為迎接強積金半自由行做準備，敏妮以為滙豐會帶頭減價，點知捉錯路。不過他日真係發生積金受託人減價戰，相信應該會由規模大、市佔率高嘅受託人掀起，始終細規模嘅受託人，唔會用呢項做賣點。好似某間中小型受託人咁，旗下嘅股票基金，喺市況好嘅情況下，回報可以大幅拋離大規模嘅受託人，原因係規模越細越肯博，希望險中求勝。

轉受託人係後年嘅事，但轉 portfolio就事不宜遲。對於未試過轉積金投資組合嘅朋友，相信會覺得幾煩。問 10個朋友， 9個都唔知或者唔記得自己個密碼，要搵受託人問番，據知有啲受託人要成個禮拜先寄個 password俾客。落 order轉 portfolio，亦唔係間間受託人都幫你即刻轉。

敏妮朋友試過，想喺網上轉積金投資組合，佢已經事前問定受託人熱線有乜程序，位職員叫佢逐隻基金轉。朋友上到受託人網頁轉換積金嘅版面，按步驟轉完第一隻基金就㩒確認，跟手諗住轉第二隻，點知冇反應。
後來佢再問職員，先知係喺同一版面，轉完一隻再轉另一隻，轉晒先確認。由於佢已經確認，所以其餘想轉嘅基金，就要兩日之後，等之前個 order完成，先可以再落 order。朋友話，好彩個市後尾反彈，佢冇乜損失，先至冇咁揼心。

香港經濟走出衰退，美國 7月份失業率亦意外回落，金融海嘯夢魘似乎正逐漸遠離，但各國政府為挽救經濟，不斷印銀紙，上個禮拜長和系公佈業績，首富李嘉誠亦提到，擔心通脹遲早會嚟。

通脹殺埋身，首富話已有方法抗通脹，但唔話畀你同我聽。其實超人揸住赫斯基能源公司，通脹重臨油價勢升，佢亦自然賺多咗。不過超人一早為日後可能出現嘅經濟變化，諗定應付方法，難怪人哋係首富，呢樣嘢大家真係要學吓。

睇《華爾街日報》一篇專欄文章，提到喺通脹同通縮情況下，應該點投資部署。由於無論通脹定通縮，都係預計，篇文章每一個建議都係「兩手準備」，為一旦估錯做足風險管理。

喺通脹期，資產價格會升，尤其油價、金屬價、糧食價格，仲有就係黃金都會升，所以文章建議投資商品期貨。兩手準備係，買定通常通縮時價格會升嘅國債，以防估錯市。對於嗜炒嘅香港股民，隨住油價、金屬價上升，敏妮相信佢哋只有興趣短炒相關股份。

通脹掛鈎債券基金有賣點

其實喺金融市場，除咗炒股炒油同炒金，仲有唔少投資工具適合通脹時期投資，好似舊年就有金融機構喺香港推出通脹掛鈎債券基金，主要投資喺通脹掛鈎債券，賣點係通脹越高，派息越多。類似嘅投資產品喺外國早已出現，債王格羅斯旗下太平洋資產管理（ PIMCO）早喺今年 3月，已經估救市措施會令通脹加快重臨，建議趁通脹重臨前購入通脹掛鈎債券。

如果預計嚟緊通脹上升，呢類產品應該有賣點，喺踏入通脹周期初期買，會比確認通脹重臨先入市化算，因為呢類產品嘅特點係，高通脹時有可觀回報，但當通脹回落就會直接影響投資回報。另外一個要注意嘅地方係，呢類基金買賣成本唔低。相信亦都係呢個原因，令到香港散戶唔係咁熱衷，始終喺香港炒股直接快捷成本低。

有朋友問敏妮，究竟有冇樓揸手，點解一時話想買樓，轉個頭又話自己係業主。做業主都可以買樓，因為層樓係同屋企人夾錢買，買樓係想獨資擁有。
不過今次敏妮想賣樓，至於會唔會即刻買番，就視乎樓價。話說敏妮大概 01至 02年同屋企人買咗現住尖沙嘴物業，當時樓價已跌唔少，但大家應該記得， 02年後樓價跌得仲勁，敏妮屋企隔離個單位，比敏妮屋企多一間房，但樓價就便宜 18%。

尖沙嘴置業門檻高

前年，隔離單位業主因多添一位成員，所以喺黃埔買咗個更大嘅單位，同時放售住緊嗰個，事隔兩年，層樓終於以佢心儀嘅價賣出，賬面賺咗 1倍有多。
敏妮恨得牙癢癢，同朋友講，十個有九個都叫敏妮賣樓，趁隔離屋就已經係樓價指標。敏妮亦心郁郁，但一諗到搬出住咗咁多年嘅尖沙嘴區，都唔知搬去邊？就唔敢諗。
更重要係，敏妮驚喺尖沙嘴置業嘅門檻會越嚟越高，遷出後，仲有冇機會返番嚟。一位地產界朋友同敏妮講，家陣最具「潛質」嘅地區，非西九龍莫屬，尤其九龍站上蓋嘅物業，呢點同北望神州有關。環球貿易廣場（ ICC）入伙，雲集唔少跨國公司，當中不乏國際金融機構。單睇港鐵九龍南線尾站喺西九填海區柯士甸道，就可以大約構想到，日後喺 ICC嘅 businessman或者 banker，喺柯士甸站就可以坐地鐵去尖東站，再轉火車返大陸。

九龍站上蓋潛力大

中環嘅商業中心地位唔會動搖，做生意穿梭中港亦會越嚟越普遍，西九近中環又方便返大陸，自然旺，嗰度嘅樓當然搶手，有錢當然買九龍站嘅樓，次一線揀下一個奧運站，至於尖沙嘴站同尖東站，雖然步行先到，但都掹到車邊。咁你話敏妮點會唔驚，出咗去入唔返場嘞！

前排有位嚟緊將要入大學嘅朋友話，做暑期工賺到好幾千蚊，由於爸爸媽媽有畀零用錢，所以呢筆暑期工薪金，可全數儲起。佢問敏妮點樣善用呢幾千蚊嚟投資？

幾千蚊放喺銀行，家陣莫講話冇息收，分分鐘低過最低結存要畀月費。最直接嘅投資，首選股票，但得幾千蚊本，無理由因 budget有限叫佢買細價股，家陣穩陣啲嘅藍籌股，入場費都要過萬蚊， over咗呢位年輕人嘅 budget，碎股買入賣出都要蝕價。

敏妮諗嚟諗去，都覺得應該買股票，因為咁少錢買基金，扣埋認購費、手續費、管理費，買唔到幾多個基金單位。買股票成本輕過基金，但與其買碎股，不如的起心肝月供。敏妮建議佢每個月只係供 1000蚊，雖然可以買到嘅股票唔多，但問題係，佢家陣就話有幾千蚊現金，夠供幾個月股票，當一旦新學期開始點算？

做兼職月供股票訓練恒心

敏妮建議佢搵份 part time，大學生做 part time好常見，早啲出嚟社會，學到同見到嘅嘢比課堂更多，而且只係應付 1000蚊供款，應該唔算太大壓力，某些日子要應付功課考試，又可以暫時停供，畀自己有番啲彈性。其實最緊要訓練自己有恒心，累積財富。

至於供邊隻股票？呢個問題最難解決。敏妮建議兩隻，一係國壽（ 2628），呢隻係聽投資版某位前輩講嘅，佢話自己每逢低位就買，儲嚟畀對寶貝仔女。事實上，任何先進國家保險滲透率都好高，中國正值崛起，市民對保險需求只會不斷增加，反正作長線投資，睇好保險業前景，揀板塊裏面最大嗰隻嚟供。

另一選擇係盈富（ 2800），大市有升有跌，但睇往績都係向上，揀盈富有息派又唔怕跑輸大市。對於呢位投資新丁，勝在有大把時間，即使日後投資遇挫，仍有大把時間追番。

報紙財經版大字標題話調整恐快臨，係時候調整投資策略。個人投資組合裏面，最多人忽略應該係每月都要供款嘅強積金，原因可能係大家仲未有得自己揀積金受託人，覺得投資好被動。

積金受託人冇得揀，唔代表成份基金冇得揀，雖然強積金嘅投資理念係「平均成本法」，理財專家亦話，市況唔好，基金價格便宜時可買多啲基金單位，市況好時，所持嘅基金組合會水漲船高，但要提升回報，更好嘅做法當然係「低買高沽」。

兩個月仍算短線投資

投資市場變幻無常，之前曾經聽過一位理財專家講，家陣好多基金投資者嘅投資態度，都由長線變得相對短線，當然未至到好似股票咁，玩即日鮮，但對於投資基金嚟講，一、兩個月已經算短。

更改積金投資組合，原理同投資股票換馬分別不大，就好似近排港股暢旺，股票基金 7月份投資平均增長 9.61%，跑贏其他成份基金，但一旦大市調整，會影響股票基金嘅投資表現，如及時贖回基金單位，換馬去其他同股票基金表現相反嘅成份基金，好似債券基金或者貨幣基金，就可以鎖定回報。

如果驚轉咗投資組合會錯過低吸良機，大可採用互補策略。就以敏妮為例，由於投資屬進取型，投資組合幾乎全部係股票基金，咁嘅話，可以將已供嘅股票基金贖回，轉去穩陣嘅基金類型，至於每月新供嘅，就繼續買股票基金。

遇到一直跌市，雖然基金單位會越買越平，數量越買越多，但真係一沉不起，揸住嘅都係蟹貨。

滙控（ 005）星期一公佈業績，有分析員喺業績公佈前預期，滙控會見紅，相信今日唔少應屆會考生都希望同滙控一樣──好彩合格 pass！
嗰日見滙控公佈完業績，喺美國掛牌嘅預託證券股價急升，兩位股壇前輩就喺度研究，點解投資者咁睇好滙控。
其中一位前輩話，雖然有人估滙控半年業績見紅，但真係咁估嘅大行其實唔多，而佢睇勻成份業績報告，都唔覺有乜特別勁嘅利好消息。另一位前輩就估，應該係撥備冇想像咁高。

供滙控低位儲貨

敏妮上網睇外國傳媒嘅分析稿，《華爾街日報》報道，由於美國消費金融業績嘅減值撥備比估計嘅小，加上滙控主席葛霖話，雖然經濟前景仍然好唔明朗，但佢哋應該已經跨過，或者將近跨過金融市場谷底，刺激股價上升。
一向保守嘅滙控話自己走出谷底，長線投資睇前景，相信股價升係因為投資者投咗信心一票。
敏妮慶幸由月供港交所（ 388）轉軚月供滙控，冇錯過喺低位儲滙控嘅良機，家陣新一批供返嚟嘅滙控成本極低。
敏妮相信葛霖講，滙控走出谷底，日後會有更好前景，但家陣繼續月供滙控就冇所謂，當儲錢，但入市買敏妮就唔敢，敏妮相信嚟緊大市會調整嘅講法，真係睇好，到時先買都唔遲。

做期權降低成本

不過新一批供返嚟嘅滙控，賬面上賺緊錢，但喺供港交所之前供返嚟嘅滙控，仍然坐艇遲啲先見岸，股壇前輩叫敏妮與其白等，浪費機會成本，不如做期權，反正有貨喺手可以做吓 covered call，喺心目中嘅價沽貨，收期權金將貴價嘅滙控成本降低。勝在有貨喺手，風險有得控制，係唔錯嘅策略。

個市越升越有，一啲已經冇見好耐嘅場面又出現。話說敏妮上個禮拜要去銀行搞啲手續，排隊嘅時候，見到唔少 auntie級散戶，揸住個股票機篤篤吓，兼異常肉緊咁企喺個 counter度叫職員幫佢買入或沽出股票。敏妮認識一位前輩仲話，除咗銀行股票行多番啲散戶，仲有一個佢好耐冇見嘅場面，就係 seminar一個接一個。

前輩經常都應邀出席呢啲 seminar，佢話由舊年尾到今年初，可以話冇人搵佢去 seminar，但近嚟就唔同，差唔多每個周末都收到邀請，一個月起碼 2、 3單。敏妮即時問：「咁即係牛市到咗第二期？」前輩認同敏妮嘅睇法，不過，佢係用圖表技術分析得出呢個理論，敏妮就只係單純用近期社會現象嚟揣測。

大市倘調整　港交所可翻兜

敏妮聽到佢咁講，突然覺得有啲唔妥。記得 7月 3號，敏妮有篇講港交所（ 388）嘅文章，當時因為覺得香港嘅國際金融中心地位，會俾上海蓋過，香港只能配合，好難攞到好大優勢，加上當時港交所升咗一段時間，所以敏妮開始盤算沽售月供返嚟嘅港交所，結果講完冇耐，港交所回落咗幾日。當時嚟睇都算唔錯，呢頭叫沽嗰頭個價跌。

不過，近排股市大旺，日日成交都喺 700億左右，港交所股價當然醒神，如果當時沽完有即刻叫撈底，敏妮就發了。家齋嗌沽衰咗，有錯要認！

牛市二期仲未到雞犬皆升，前輩預期嚟緊會有調整，之後就進入牛市第三期、最瘋狂嘅境界，成交旺即係港交所做多咗生意。之前月供港交所諗住長線投資，但唔睇好佢前景所以要沽，家陣睇如果大市真係有調整，應該要持有或者買番啲，但純粹炒短線。

不過，敏妮驚家陣嗌買，又變明燈！