敏妮Talk

敏妮禮拜一講過，新股有大孖沙認購，可以當免費宣傳，吸引散戶認購，但散戶唔一定有錢賺。好嘅唔靈醜嘅靈，話口未完噚日上市嘅中冶（ 1618）就跌穿招股價。「香港股神」四叔李兆基都呻，上市公司搵名人認購製造名人效應，佢係畀面先至抽，但都冇得賺。

之前提到敏妮會抽一手國藥（ 1099）、一手中冶，另重注一啲抽利郎（ 1234），點知三隻都落空，敏妮都算好彩！國藥首日上市雖然都有得升，但升幅遠遜市場預期。中冶名副其實「抽『中』就揩『嘢』」。至於敏妮重注抽嘅利郎究竟會唔會係呢期嘅黑馬，今日開估。敏妮唔係講風凉話，但抽唔中，起碼唔使驚跌穿招股價。

家陣應持盈保泰

其實唔同嘅投資市場，走勢有時幾相似，好似樓市咁，每到旺市，大發展商會「有秩序」出貨，但到接近尾聲時，唔同嘅發展商趁市場購買力未消耗盡，鬥快傾銷手頭嘅貨。近排新股市場都一樣，好似噚日咁， 6隻新股一齊招股，夠錢抽晒咁多隻股，都唔夠時間研究佢哋有乜優點缺點。到咗呢啲時候，敏妮幾鍾意抽新股都好，都冇興趣抽，即使一眾新股裏面不乏黑馬，但敏妮純粹用港女諗嘢方法，正係「多就唔矜貴」。

商業社會，任何嘢都有價錢，至於價錢點定，當然最重要係睇件嘢嘅質素，但更重要係「物以罕為貴」，一下子 6隻新股任揀，仲唔當堂 cheap晒。如果呢班投資銀行家，覺得個市仲有排炒嘅話，使唔使爭相推啲貨出嚟先。敏妮作為一般散戶，睇市點都叻唔過「貪婪」嘅投行 banker，呢啲時候都係持盈保泰比較安全。

上個禮拜睇新聞，「香港股神」四叔李兆基嫌家陣抽新股只係「賺粒糖」，唔夠吸引。點知另一邊廂新一代中國「女股神」劉央侃侃而談點樣揀新股。一時間，中港兩地股神，都唔知跟邊個好？

摷番資料，今年已上市嘅新股，四叔一共抽咗 3隻，包括 361度（ 1361）、金隅（ 2009）同承達（ 2288），至於劉央旗下嘅西京投資就認購咗秦發（ 866）、金隅、中國全通（ 633）同中金再生（ 773）。除咗一隻熱爆新股金隅相同之外，兩地股神口味的確有分別。論成績，四叔抽嘅承達首日就跌穿招股價，劉央好啲，抽 4隻首日都幸保不失，但隻秦發踏入 9月份就潛水。

大戶散戶玩法不同

劉央話抽新股唔係短炒，睇長線先至有可觀利潤。至於四叔「賺粒糖」嘅講法，應該係從短炒角度出發，但咁耐以嚟又好似冇乜聽聞，四叔會好似一般散戶咁，抽咗隻新股返嚟首日掛牌即沽。換言之，四叔同劉央抽新股都唔係短炒，同咱們一般散戶玩法有別。不過今年上市多隻「新股王」，好多隻都有頭威，冇尾陣，散戶早沽反而有着數，想好似劉央咁長揸博賺幅大啲，等隻股上市之後，睇定先再買都仲有機會。

再睇吓兩位股神唔吼嘅新股，霸王（ 1338）、琥珀（ 090）、興利（ 396）同志高（ 449）等，首日掛牌都帶挈散戶賺到笑。對於上市公司嚟講，有大孖沙認購，可以當免費宣傳，吸引散戶認購。不過對於一般散戶嚟講，有大孖沙入股，似乎唔一定係必賺指標。

讀者 Doris喺敏妮 Blog度留言，佢話已經買咗壽險同基本嘅住院保險，份壽險仲一早已經供完，問敏妮使唔使買份危疾？

資料就係得咁多，敏妮只能就有限嘅資料回應。首先買保險係睇需要，唔係話有閒錢就買，所以 Doris抱住供滿份壽險，搵過另一份保險嚟供嘅心態，錯晒！有錢不如供基金、供股票。至於應唔應該買危疾？答案：應該！

一個人究竟要買啲乜嘢保險？保額要幾大？呢啲係敏妮經常俾人問到嘅問題。由於唔知 Doris結咗婚未？有冇家庭負擔？所以好難好到肉咁同佢分析。一般而論，咁多類保險產品，敏妮覺得最重要，必須考慮買嘅係住院同危疾兩類保險。香港嘅公共醫療系統，質素如何唔使敏妮多講，私家醫院嘅收費又貴到你唔信，不過有病就梗係想有好嘅醫療服務，患上疾病無論對自己同家人都已經造成好大負擔，梗唔想仲要為錢銀煩。

住院危疾唔少得

醫療保險實報實銷，入院住咗幾耐，醫療開支幾大，可以按所買嘅保險 claim番，紓緩病者同佢家人嘅經濟壓力，所以有必要買。至於危疾，直接啲講有啲似中 jackpot，如果買咗危疾保險後，不幸患上保單受保嘅危疾，就會有一筆錢作賠償。

雖然話買咗醫療保險，入院已經有賠償，但試諗，患上危疾好似 cancer咁，要做好多檢驗、檢查，加上即時唔返得工，好需要一筆應急錢，所以買危疾保險亦有必要。

反而最多人買嘅壽險，敏妮就覺得唔係每個人都有需要。好似敏妮咁，單身、家庭唔算大負擔，爸爸媽媽自住層樓供滿咗，兼已經預備好退休金， touch wood敏妮有乜冬瓜豆腐，爸爸媽媽生活應該冇大問題，所以對於敏妮嚟講，壽險反而唔係太重要。不過對於某啲孭住樓債、兒女債嘅家庭經濟支柱嚟講，有乜事會令家人生活拮据，咁就有買壽險嘅需要。

國藥（ 1099）本來噚日中午截飛，但因為八號風球延遲咗一日。敏妮一早已經搵經紀 H交咗認購申請，所以冇乜影響，但同朋友傾起 IPO延遲一日截飛嘅影響。

其實影響有幾大，要視乎會唔會影響跟住個 schedule，最驚係佢全部順延，咁孖展客可能要畀多一日息，影響投資成本。不過對於上市公司嚟講，可能係好事，因為凍結咁多資金，收多 1日息，唔好話唔和味。敏妮問公關 C，佢話幫國藥上市嘅係投資大行，個 schedule應該唔使順褪，否則咪即係話畀人聽，自己人手掹掹緊，失禮人嘛！
講開計息，喺家陣低息環境下，散戶認購金額唔多，利息損失有限，但對於上市公司嚟講，就有一筆唔少嘅特殊收益嘞。

以國藥為例，超額逾 100倍幾乎係「實食無黐牙」，零頭唔計，就用超額 100倍計，凍結資金超過 880億銀，以年息 1厘計， 7日都有近 1700萬息收。好多上市公司成年都不過賺嗰千零萬。公關 C話，前幾年息高，呢筆特殊收益都唔少 o架，但呢排利息低企，驚喜就細咗。
講番國藥，如果真係延遲一日先上市，可以收多兩百幾萬息，對於咁大型嘅公司嚟講濕濕碎，但對於一般人嚟講，真係唔講得笑。

幾乎可以假設國藥（ 1099）同中冶（ 1618）會大倍數超額認購，至於另一隻利郎（ 1234）敏妮亦相信會超額。據 3隻新股嘅招股文件，資金有限又唔想借孖展嘅敏妮，初步有盤算。

國藥如超額認購 50倍以上，公開招股股數增至逾 1.9億，即係只得 47.7萬手。之前隻熱爆新股金隅（ 2009），有逾 40萬人認購，今次國藥應更厲害。計真啲，公開認購分甲組同乙組（以認購金額 500萬元為分水嶺），兩組平分 47.7萬手貨，即每組 24萬手貨都唔夠，上次金隅就有超過 39萬份申請入甲組，想一人起碼有一手應冇乜可能。中冶超額 100倍或以上，公開招股股數增至 5.74億股，即係 57.42萬手，多過國藥，但甲組都係得 28.71萬手，都係唔夠分。

抽新股要不時變招

唔少專家已叫散戶成家總動員一人抽一手，博同一樣資金，多幾個抽中機會。敏妮跟潮流，中冶同國藥各抽一手，唔會用太多彈藥博穩有一手，原因一係當買六合彩，反正抽唔中原銀奉還。原因二係人人都識只抽一手，令抽一手散戶勁多，喺呢個情況下好難保證抽幾多手先可穩獲一手。原因三要留彈藥博隻少啲人抽嘅利郎。

相對國藥同中冶，利郎聲勢弱好多。利郎保薦人係美銀美林，對上一次美林保薦嘅公司係 361度（ 1361），招股時間喺霸王（ 1338）同琥珀（ 090）之前，超額認購逾 40倍，最後公開發售股數 15萬手，抽 3手穩獲一手。
如果今次利郎都係超額 40倍，公開招股部份得 9000萬股，即係 9萬手，甲組得 4.5萬手分，如果超額逾 100倍，公開發售部份有 1.5億股，即係 15萬手，仲少過國藥同中冶，相信都好難做到一人一手，但敏妮諗住重注啲抽，博抽嘅人少兼都係重注抽，谷大超額倍數。雖然 361度首日只升 8%，升幅有限，但抽中嘅機會高，總算有派彩。

今日上市嗰隻現代傳播（ 072），敏妮亦有入飛抽 4萬股，按分配基準抽 3萬股穩獲 1手，敏妮啱啱過關有 1手。
凡事鍾意睇往績嘅敏妮，對於呢隻股有少少保留，事關幫佢上市嘅保薦人，前科麻麻。上個月中幫承達（ 2288）上市，點知上市當日股價撐唔夠一個上晝，就跌穿招股價，家陣都未返家鄉。

雖然有咁嘅往績，但敏妮仍然認購，純粹捉心理。翻查資料，好似冇乜見過 ICBC之前保薦過啲乜嘢公司，後來問番朋友，先知班 banker之前唔係用呢個寶號幫人上市。唔理佢之前嚟自邊個寶號，但用新牌頭，點都唔可以幫兩間公司上市，兩隻股都一上市就潛水 o架！就算你之後有部署，但吓吓都頂唔到一個上晝，令上市公司主席丟架，好影響形象。

再用陰謀論睇，本來認購反應麻麻，點知臨尾一腳，突然神勇，相信有關方面唔會令畀面入飛嘅名人損手。實際啲，好多抽咗飛嘅，見隻股唔聲唔聲，嚇你一驚，應該揼心，或者會考慮入市翻兜，同樣可以支持股價。

用坊間理論分析

睇埋數據，噚日現代傳播公佈分配基準， 2948人認購，其中甲組（認購金額 500萬樓下嘅）佔 2755人，但一股都抽唔到嘅就有成 1340人，佔成半。至於好似敏妮咁嘅「一手黨」，有 591個，佔認購人數兩成左右。

數字一堆，敏妮會咁樣睇，一般嚟講，如果本來想認購，但又抽唔到，都應該會考慮直接喺市場買，換言之，抽唔到嘅人多，係利好股價嘅因素。至於一手黨，賺極都係一千幾百飲餐茶，最多豪啲夠食餐飯，所以一手黨一係會加碼，但好多都會見好即沽，呢個係利淡因素。按比例計，沽壓唔算重。呢啲都係坊間理論，一切要等今日開估。
敏妮會睇埋暗盤價，始終前科唔好，今日開市見唔到暗盤價即沽，撐得住就睇埋上晝再算。

近日最多公司同事討論嘅新聞，係接連有凶宅同公屋成交，仲要係買家追價，敏妮相信追價買呢類單位嘅朋友，冇乜邊個係自用。不過見到樓市去到連呢類咁「冷門」嘅樓都有人爭，令敏妮諗到股市喺升到尾時，所謂「藍燈籠」嘅股都升嘅景況。

其實買凶宅甚至公屋投資，冇話唔妥，都係睇你計唔計掂條數，凶宅「賣點」係價錢平，用嚟炒要睇個市就唔就，有冇人肯接棒。用嚟出租，就要睇收租回報，但由於樓價基數低，即使租金比市值租金低，仍會有不俗嘅租金回報。

業主握主導權

敏妮翻查舊資料， 05年時亦因樓市急升，市場貨源缺乏，令一啲丟空好耐嘅凶宅都有成交。不過跟住嘅 06年，樓市就變得好淡靜。敏妮問過一位地產界朋友，家陣樓市好似股市咁，連「藍燈籠」股都升，會唔會係水尾徵兆？朋友話好難講，因為就算係水尾可能仍然會撐到好一段時間。「不過，家陣市場真係冇乜二手盤源，尤其交吉嘅『鎖匙盤』就更少，所以家陣有樓喺手，係賣樓好時機。家陣係業主市場，可以反價再反價，都唔憂冇客。」當然相反嚟講，想置業嘅人就俾業主「㩒住嚟打」，所以等得嘅就無謂家陣追入咯。

講開置業，敏妮前排同一位喺某發展商企業傳訊部做高層嘅友好傾偈，講開樓市炒風，佢都話買樓最忌俾氣氛引導，好似喺一手樓嘅售樓處，俾經紀催多兩催，好易落錯決定。佢仲話唔單止買一手樓，就算二手樓都一樣。話說佢個仔之前想喺愉景灣買樓，入去睇發覺嗰度空氣清新，直情係石屎森林中嘅綠洲。做阿爸嘅當然要幫佢問吓行家，點知阿爸嘅朋友講，「叫你個仔咪咁心急，風和日麗入去就梗係梳乎啦。叫你個仔試吓打風落雨入吓去，先再落決定啦！」
投資買樓係一生重要投資，行內人買樓尚且要做咁多準備，何況一般散戶。