敏妮Talk

俾人投訴話敏妮偷懶唔寫稿，令《敏妮 Talk》見報率越嚟越低，真係要呼寃，查實係因為經濟好，廣告多，經常稿擠。另一原因係理財版內容越嚟越豐富，所以已「逼埋牆角」嘅敏妮，要更珍惜可以見報嘅機會。

冇得睇樓都想買

前幾日收到手帕交 V嘅電話，劈頭就問，「敏妮，邊間銀行樓按最抵！」吓，唔係家陣入市買樓吓嘩？唔問尤自可，一問， V即刻要敏妮畀意見。佢話睇中咗層港島區樓，喺佢 office附近，雖然唔係一手盤，但樓齡唔算高。聽落都係好理由，但如果 V認為層樓咁「抵」，應該唔使問敏妮意見，原來另一個令佢猶豫嘅地方係，「冇得睇樓！」

叫得佢做手帕交，唔啱聽敏妮都要講，大嗱嗱幾百萬蚊，睇都冇得睇就要買？除非係用嚟炒唔係用嚟自住，仲要肯定之後有人接你「火棒」。另一樣係買嘢最緊要問價錢，點知佢話：「 OK o架，都未去到層樓嘅歷史高位。」

的確好多物業嘅樓價，已經返到高峯時水平，甚至升穿歷史高位，但另一角度諗，層樓未升到高位，係咪同本身質素有關呢？追落後唔係唔得，但要睇清楚層樓嘅樓價係長期落後大市，抑或係因為本身質素限制咗樓價升幅。

公屋圍繞價難升

前幾日同位有名嘅學者食晏，佢提到，研究咗某幾個區嘅樓盤，發現有一個因素好影響樓價，就係附近嘅規劃。如果嗰區本身公屋臨立，通常樓價都好難升得起。當然 V睇中嗰層樓並非公屋圍繞，但有冇其他因素限制樓價升幅，敏妮建議佢先做吓功課。

佢覺得 OK嘅樓價，似乎係俾近期不斷創新高嘅「豪宅」呎價干擾。的確近期樓價升到癲，好多人都驚，再唔上車就冇機會，但 97年時，都好似有同樣嘅聲音。當然歷史係咪會循環不息，大家都唔知，但喺咁 uncertain嘅情況下，似乎應該「停一停，諗一諗」。

噚日中央出咗第三季經濟數據，確認已經踏上復蘇之路。其實敏妮隔日就收到編輯話：「今日稿擠，《敏妮 Talk》暫停一天。」已知個市好番，唔係邊得嚟咁多廣告噃！

敏妮上嗰篇文章，講到用手機收廣告有 1蚊賺，咁耐敏妮只係收過 1條，即係賺咗 1蚊，得啖笑。不過流動網絡嘅商機真係無限，敏妮上個禮拜出 trip，認識咗班 tech人，先至深深覺得，自己原來生存喺「石器時代」。雖然係咁，但可能喺網絡世界，大家習慣認識唔同嘅朋友，大家傾傾講講，好快熟絡。亦係咁，敏妮明白網絡嘅動員能力，點解會咁強咁快咁廣。

藉網友試新產品推廣

呢一點對於好多企業嚟講，係一個商機。公關朋友同敏妮講，好多時啲生產商有新產品推出，都會搵人試吓，一來做吓推廣，二來可以測試市場反應。由於越來越多人玩 Facebook、 Blog等，所以佢哋就透過呢啲渠道，搵網友試新產品。

以為佢哋一定係試手機、軟件等新科技產品，錯！公關朋友講， BB尿片、奶粉，都係搵 Facebook fans、 blogger試用，等佢哋喺自己個網上地盤講番用後感受。呢一招真聰明，家陣啲消費者鬼咁精，你賣廣告硬銷，大家未必信，但身邊朋友話你知好唔好用，就信嘞！

網上商機無限，唔單止係商業層面嘅商機，對一般投資者亦都係投資亮點，就好似敏妮同股壇前輩講番今次出 trip收穫時，佢即時話，要留意吓啲科技股，尤其做 application嘅公司。又係嘅，搭地鐵成日見到隔籬乘客用 iPhone上網，比起 2000年科網股時代，家陣科網嘅應用會更實際，認識多一啲科技公司，唔難發掘到新投資機會。

相信好多朋友都好似敏妮一樣，極端抗拒手提電話嘅宣傳滋擾。不過近日契大佬 Kenny同 Uncle Ray就好期待收到 SMS廣告，原因係收一個廣告佢哋就賺一蚊。「邊有咁大隻蛤乸隨街跳！」

之前已有報道講呢個賺錢模式，簡單嚟講，開發呢個 business model嘅人針對大家都唔鍾意收手提電話「硬銷」廣告，諗咗解決方法，香港人最實際，睇完 SMS廣告有錢收咪睇囉！嗰位開發人兄就同廣告客戶傾，手機機主每收一條 SMS廣告，廣告商要畀兩蚊呢位人兄，佢分一蚊畀接收呢條廣告嘅手機機主，自己袋一蚊，當然扣埋燈油火蠟成本開支，實際落袋得 6毫，但發 1條廣告畀 1個機主就 6毫， 100個手機機主每個收 100條廣告短訊就係 6000蚊。

漏洞靠大家監察

越多人參與，開發人兄賺得越多，要令多啲人參與，最快嘅方法又係用錢嚟吸引人，所以推出咗個推薦人計劃，已經參與接收廣告嘅手機機主如果介紹人參加，到某個數目就有獎金，如果參加人數達到更高數目，仲可以喺呢啲「下線」嘅營業額中分紅。

成個 concept好簡單，敏妮上網睇過呢間公司嘅介紹，佢實牙實齒話唔會將參加者嘅資料賣畀人，又話參加者可以隨時要求中止。敏妮衡量過，由於唔需要畀會費，又唔會好似層壓式推銷咁要先買一堆貨，喺最差情況下最大損失係個網站攞咗參加者嘅私人資料，包括姓名、地址、電話、出生年月等。暫時嚟講，敏妮仲未見到有乜「破綻」，所以亦都「落叠」參加，但都係嗰句「小心駛得萬年船」，所以敏妮借呢個專欄講吓呢盤生意，如果真係搵 money嘅，大家分享，如果有乜漏洞，亦有大家一齊「監察」。

雖然近幾隻新股已經冇一上市就潛水咁慘情，但旺勢已去，敏妮都冇興致再抽。至於黃金，反而敏妮個 portfolio就有少少，都係前年跟光頭仔買嘅。光頭仔揸嘅黃金，出出入入炒咗幾轉，至於敏妮嗰少少就仲壓喺度。佢噚日問：「敏妮你嗰啲金仲喺度呀呵，今次發啦！」又唔係買得多，即使家陣高位沽出，同 Mr. B贏場波差唔多，但擺喺度咁多年，冇息收，兼損失機會成本。

講番敏妮首次買金，係 07年底嘅事，當時股市波動、樓市大旺、銀行息低，好多朋友套股買樓，光頭仔就套股買金，有錢賺，敏妮當然跟。雖然 07年到家，黃金都經歷過幾次高位，但敏妮都冇把握時機沽貨，除咗因為持貨少，即使金價創新高，沽咗都係賺千零蚊，所以唔係好着緊，結果錯過時機，仲有另一原因。

有買入　才貼市

敏妮之前睇過有篇文章訪問前輩曹仁超，提到曹 sir 2000年已經睇好黃金走勢，但就逐少買入金幣，到 01年確認黃金升勢，先至大注買入，結果勁賺幾百萬蚊。曹 sir解釋，自己逐少買入金幣，係令自己留意金價，親身感受個市場，睇啱嘅話就大注博，睇錯都唔會輸身家。敏妮當然冇曹 sir咁勁，要親身感受市場氣氛，但由於敏妮跟光頭仔買黃金，每當金價有異動，佢就會提醒敏妮，變相令敏妮變得貼市。

其實敏妮都心郁，諗吓好唔好趁高位沽金，但一諗到家陣美元咁唔穩陣，港元又同美元掛鈎，敏妮寧願揸金保值，反正存錢喺銀行一樣冇乜息收。

消費市道最能反映經濟情況，經濟差，好多人就算未至節衣縮食，起碼消費時都會勒住。噚日澳洲央行率先宣佈加息，環球經濟似乎已走出谷底。其實消費市道，都見到呢個趨勢。

每年呢個時間，編輯 M都會忙到不得了，飛完美國返香港，行李都未執，又要飛去米蘭，跟手去埋巴黎先返香港。事關新一季時裝登場，各大時裝之都嘅時裝節，編輯 M都要親自去。

記得上季，編輯 M去歐洲睇時裝騷不斷呻「經濟真係差到你唔信，以前去時裝節，啲大牌子排場誇張， souvenirs多到帶唔到返香港，呢次去，莫講話 souvenirs，去到個場地連水都冇杯畀你。」可見名牌生意有幾差！不過今季唔同晒。

前排幫新股上市，做到唔停手嘅公關 C，荷包腫脹之餘，託敏妮搵編輯 M入貨買名牌袋，慰勞吓自己。前幾晚收到編輯 M嘅電話，佢沒好氣話，「你同公關 C講，佢睇中嗰個新款，一出就賣晒，幾萬蚊一個袋，啲人好似唔使錢咁！」就算經濟唔係真正走出谷底，起碼消費意欲已在復蘇中。

連續 5隻新股都一上市就潛水，但樓市就相當硬淨。上個禮拜又聽聞凶宅成交個案，今次仲係豪宅嚟。股市好，新股自然旺，新股旺投資市場氣氛好，個個股市賺到錢就轉投樓市，好啱邏輯。相反港股跌幾日先彈一日，新股又接連潛水，但樓市仲有價有市，究竟係咪一個常規？

敏妮就做咗個非正式 research，翻查 06年至今嘅新股往績，連續 5隻新股上市首日跌破招股價嘅情況，真係冇見過。頂多都係舊年 6月初時，特步（ 1368）、建業地產（ 832）同寶勝（ 3813）上市時，試過「串燒三兄弟」，其他頂多連續兩隻新股跌穿招股價。

不過以當時整體新股表現嚟做參考，比較同一時期嘅樓市。舊年連環 3隻新股潛水時，按中原城市領先指數同期都係連跌幾個月，之後冇乜點升過。當然舊年金融海嘯，尤其 9月後，百業蕭條，敢入市嗰啲人，同沙士入市嘅人一樣，有膽識兼有本錢，抵佢賺。

睇歷史　各有前因

睇埋 07年，個市最弱應該數到年底時，由中外運（ 368）上市當日即潛水起，幾乎隔一隻新股上市首日就潛水。同期嘅樓市相反，升唔停。當時息率低企，加上投資者憂慮通脹，唔少將喺股市度賺到嘅，先套現鎖定回報，再轉戰樓市。好合敏妮之前嘅邏輯推論。

不過 06年又係另一個故事。當年 5月 24號至 7月 5號期間，總共有 8隻新股上市，一半上市首日即潛水。不過當年唔係啲錢流咗入樓市噃，樓市冇升反而跌到年底。睇番當時嘅報道，話股市波動，影響投資者買樓意欲，加上世界盃效應，少咗人睇樓。

然則家陣樓市嘅旺勢企唔企得穩，真係點估都得，反正實有解釋理由。

連續幾隻新股嘅暗盤價都跌穿招股價，一上市即潛水就更加唔使講，好多招緊股嘅新股，之前話會認購嘅機構投資者，聽聞都抽飛。物極必反，尤其投資市場，弱勢一形成，幾好質素嘅股份都要捱。估唔到抽飛、炒唔起嘅「勢頭」會蔓延到渣打 150周年紀念鈔。

噚日睇電視，見到不少市民晨早去渣打銀行排隊買紀念鈔，喺電視台鏡頭前，唔少人都不諱言自己買嚟炒。不過據報道，紀念鈔冇市場，仲有唔少之前訂咗貨嘅買家縮沙。

香港人腦筋轉得快，見勢色唔對，寧願嘥咗排隊嘅工夫，即場原價沽貨。

不過喺股市，好多投資者就未必咁當機立斷。就以抽咗新股嘅投資者為例，如果分到一手，但隻股唔升，甚至潛水，好多投資者寧願繼續持有，博有機會反彈，因為一手貨講緊都係幾千蚊本錢，就算壓喺度都唔算係乜嘢，更重要係，抽新股都要輸，感覺唔好嘛！

留資金掃靚貨

敏妮本來都有呢個心態，但股壇前輩成日講，即使幾差嘅市況，都有逆市升嘅股票，只係你可唔可以搵到，同嗰一刻仲有冇本錢入市。又有一位地產界嘅朋友，得閒都有玩吓股票，佢同敏妮講，喺市況差嘅時候先至要去買嘢，因為如果唔係市況差，揸住好嘢嘅人點會肯割愛賣畀你，所以喺市況差時，最緊要令到自己手頭有充裕資金，先可以把握機會掃貨。

試諗諗，一隻新股 locked你幾千蚊，幾隻新股就 locked幾萬銀，與其揸住一大堆呢啲冇往績嘅新股，博佢反彈，不如套現，等買優質平貨仲實惠。