敏妮Talk

民生銀行（ 1988）上市前一日，暗盤價只係升得 1.2%，散戶都應該心知不妙，果然掛牌至今，完全無上過「水面」。都怪喺佢上市之前，傳出內銀股要提高資本比率。

敏妮之前提過借孖展抽民行，以兩厘孖展息計，借九成抽 8304.3萬股「頂頭槌」飛，每股成本 9.34元，畀你暗盤沽得出，每股都要蝕毫半，以「頂頭槌」飛嘅中籤率，抽到 158.85萬股，即係近 24萬銀。不過，曾淵滄教授都話，民行首日潛水佢都唔驚，當日就喺市場買，咁仲揸住民行嘅散戶應該唔使驚。

民行大熱倒灶，唔多唔少影響散戶抽新股嘅熱情，但對敏妮嘅影響就唔大，因為有隻新股敏妮諗緊認購。講緊嘅係招緊股嘅龍源電力（ 916），有證券行開出，孖展息低到 0.6厘，銀行嘅一口價套餐仲低息，簡直係「息誘」散戶借孖展。成本低咗，風險自然降，不妨搭吓順風車。龍源係中國最大風電企業，炒板塊當然有大「炒」大。

龍源點睇都抽得過

何況下星期一（ 7日），多個國家嘅領導人會齊集哥本哈根，出席氣候會議。喺之前，美國總統奧巴馬提出咗未來十年嘅減排目標，雖然話「出手比較低」，但都叫做表咗態。另一方面，中國亦拋出減排目標，比市場預期高。兩個排放碳嘅大國喺之前都釋出「有偈傾」嘅心意，你話如果喺會議期間，有啲乜嘢好消息傳出，夾正龍源上市，咁仲冇得借勢炒一轉？

再生能源係未來各國嘅發展大方向，中線持有應該都有唔錯回報。內銀股經常會出現中央要提高資本充足比率水平，或者貸款呆壞賬嘅問題，但氣候暖化係大是大非，國家又提出咗減排目標，點都會做到，唔會失信於全球，點睇龍源都抽得過。

香港人投資，離唔開股票同樓，講到股票投資，敏妮前嗰排同位基金經理食飯，聽佢講開隻比亞迪（ 1211），先明白基金經理同一般散戶喺研究股票時，係有幾大差別。

做電池嘅比亞迪，發展電動車業務，俾股神畢菲特睇中，認為有潛質。一般人見股神入股，當然會跟風炒一轉，當時比亞迪每股只係講緊 10蚊樓下，畀你升一倍，都賺到笑，會趁高位沽貨，袋袋平安。不過敏妮認識嘅呢位基金經理朋友就唔同，佢話當時覺得比亞迪應該值 80蚊。結果比亞迪喺 10月，股價上過 85.5蚊。

如果基金經理真係有能力呼風喚雨，叫隻股票到幾多錢就到幾多錢，就算啲基金收費幾高，敏妮都唔會呻唔值得啦，反正贏得番。問題就係，呢位基金經理唔係有預知能力，只係佢諗嘢嘅方法，同專業投資者、大戶嘅諗嘢方法一致，所以佢可以準確估到股價到乜嘢水平。

參照同行做比較

咁究竟佢點諗呢？開估，原來佢將比亞迪同 Toyota比，認為比亞迪做電動車嘅發展潛力，會成為另一隻 Toyota，用呢個假設嚟計算，就得出比亞迪值 80蚊。

當然一般散戶無幾多個可以好似呢位基金經理朋友咁，目光如炬。不過好似敏妮 daddy咁嘅散戶，只要炒得其法，一樣有得贏。

爸爸係退咗休之後先學炒股，起初聽消息買股，都交咗唔少學費，後嚟自知唔可以博覽群「股」，所以專攻一隻國壽（ 2628），得閒就同經紀 H打牙骹，掌握吓市況。

由於 trade嚟 trade去都係國壽，所以佢對呢隻股嘅走勢都幾掌握到。正如股壇前輩成日講，唔同人投資，有唔同人嘅 style，唔好學人，最緊要順其自然。

前幾日同朋友去尖沙嘴棉登徑 happy hour，迎面見到一座龐然大物，就係呎價 3萬嘅名鑄。不過講巴閉，都唔夠西半山嘅天匯，個個單位閒閒哋都幾千萬銀，朋友講笑話，住得呢度嘅個個都上億身家，日後入伙，樓下條街實企滿 bodyguards。

講真究竟有幾多富商真係會搬入去住？事關報道天匯買家，絕大部份都用公司名義登記。用公司登記一來一般人唔容易查到買家身份，二來方便日後轉手慳一大筆。

買賣物業要畀印花稅，天匯單位等閒賣超過 6800萬蚊，按印花稅分層，係頂點 3.75%嗰層，即係要畀 255萬蚊印花稅，夠買到個上車盤。不過用公司名義買，日後賣樓，將間公司轉手就得，買賣雙方只係畀 0.1%印花稅，慳返過百萬銀。

逾$200萬樓價　印花稅襟計

有朋友問，如果一般人炒樓，係咪都應該開間公司。呢個問題，計吓成本就知，坊間有好多公司專幫人開有限公司，上網睇吓就見到成個套餐服務，大概三千零蚊搞掂。至於出售物業，買賣雙方都要畀印花稅，一層 200萬或樓下嘅物業，定額印花稅 200蚊。即係話如果炒 200萬銀樓下嘅樓，唔使搞咁多嘢咯。

不過一旦樓價過 200萬，咁就唔同，因為超過 200萬嘅樓，印花稅分層計，就以 350萬嘅樓為例，首 300萬蚊收 4.5萬銀，餘額 50萬就收 10%，即係 5萬蚊，合共 9.5萬蚊。如果以公司名義轉手，開公司加埋印花稅，萬鬆啲蚊就搞掂。
其實好多稅務專家都會提醒納稅人，善用稅務安排，不過呢個只係講緊炒樓，如果諗住用嚟自住，就未必需要，因為 maintain一間公司都要成本。

民生銀行（ 1988）公開招股，根據民行嘅招股文件，若超額越 100倍，公開招股嘅股數會由原本 1.66億股，增加至 6.64億股，即係 132.9萬手（ 500股一手），甲、乙組平分，抽細飛嘅得 66萬手貨分。睇番當年六行上市嘅情況，其中工行（ 1398）、中行（ 3988）都有超過 95萬份申請，中信行（ 998）超過 75萬份，實唔夠分。

以往遇着呢啲熱爆新股，敏妮都會提議集合全家人嘅力量，一人抽一手，博多啲機會，但就渺茫啲。連無寶不落嘅厚樸基金方風雷都認購，正如股壇前輩講，呢隻股唔可以唔抽。

要增加抽中機會，除咗用人海戰術，最有把握當然係傾盡財力去抽，但財力有限，可以考慮借錢抽。一般理財顧問都唔主張借錢投資，但係以做生意嘅角度，適當利用借貸，可以令資金運用更具效率。特別係家陣嘅低息環境下，借孖展唔使兩厘息，個別銀行仲有一口價，所以只要計掂數， why not？

睇賬簿管理人往績

慳妹數口精，佢計過借九成孖展，抽甲組最大嗰張飛，即係 50萬股，講緊利息連手續費，成本都係千零蚊。股壇前輩講過，新股冇往績，最緊要睇 book runner（賬簿管理人）係邊個。民行由 UBS揸旗，其餘仲有中銀國際、中金、麥格理，同海通等，同樣嘅組合少見。

不過 UBS加中銀國際，就曾經幫過中行上市。中行當年超額 69倍，做到一人一手，首日掛牌收市價較招股價升 15%。如果民行開市一樣升 15%，即係每手賬面賺約 700蚊，抽到兩手都回本。

借得錢去抽，梗係希望盡量抽多啲，數就係咁計，但敏妮都要提醒一句，一切量力而為。

無論幾忙，有兩個地方敏妮總會搵時間去，第一個係朋友飯局，另一個就係書局。成日埋頭苦幹，可能你會好掌握到自己工作範疇裏面嘅事，但其他嘢就可能忽略晒，甚至同世界脫節。去呢兩個「局」，係敏妮短時間掌握市場脈搏嘅好地方。

去朋友飯局，除咗可以敍舊，由於朋友之間乜都傾得一餐，可以喺一餐飯時間，收到最新嘅資訊。至於去書局，最重要係睇吓當眼嘅陳列架，呢期放乜嘢書最多，因為完全可以反映潮流興啲乜，甚至當係「書局指數」嚟研究。前年喺書局，最多係講股票嘅書，當個市啱啱升時，只會見到一啲熟悉嘅名嘴出書，但個市越炒越瘋狂時，好多坊間冒起嘅新星都會著書立說，於是喺最當眼位置，整個陳列架都係講股票嘅書。

「書局指數」反映樓市旺

近期收視最高嘅話題，當然係樓市。啱啱過咗嘅周末，敏妮逛書局，見到好多教人買樓置業嘅書，有教人睇樓要注意啲乜，又有講樓市術語、法律知識等。雖然呢啲講樓市嘅書顯著增加，但未至整個書架都係，仲未可以同之前講股票嘅書氾濫情況相比。如果用「書局指數」嚟睇，樓市可能仲未算瘋狂噃！

講開買樓話題收視高，收到同事細 May嘅電郵，佢話上個禮拜《理財版》有篇「理財診療室」，講一位月入 7萬蚊嘅中產人士，由於要一個養 7個，加埋要供樓，根本冇餘錢，為退休同個仔嘅教育基金部署。細 May話呢篇報道，喺討論區有好大迴響，好多人討論，有人贊成專家建議，叫呢位中產出租自住嘅太古城物業，另外租間冇咁貴嘅樓住，但亦有人叫呢位中產人士，不如賣咗層樓，唔好孭咁重負擔。都話呢期講樓市有捧場客。

敏妮前幾個禮拜，曾介紹過一個收錢睇廣告的賺錢方法，但心存疑問，不過一時間又諗唔到有乜問題，所以請各位朋友一齊搵出破綻。結果有位「有心人」，將呢個網站「搵錢」方法講畀敏妮知。如果大家有興趣，不妨上敏妮 blog度睇吓有心人嘅留言。

事實上，敏妮至今只係收過一條廣告訊息，即係收到 1蚊咁大把，究竟係因為太少廣告商，抑或如「有心人」所言，就見仁見智嘞！

用半份糧供樓要三思

想坐喺度就有錢收，邊有咁易，都係踏踏實實好過。講開踏實，有位朋友啱啱出嚟做嘢，月入萬鬆啲蚊，見家陣新盤樓價等閒都成萬蚊一呎，擔心買唔到樓。

佢話自知冇乜錢，所以心頭唔高，百零萬嘅樓盤上到車就得，如果借九成半按揭，每個月儲 3000蚊，兩年後有 7萬幾蚊，夠畀首期。敏妮聽到即刻叫停，佢冇必要將自己擺喺一個咁危險嘅財務狀況當中。

7萬幾蚊現金都要用兩年時間去儲，可見佢嘅財政狀況幾咁緊絀。再講， 150萬嘅樓家陣已經唔易搵，冇錯借九成半按揭，首期 75000蚊，但律師費、代理佣金呢，有冇預到？

即使你按計劃上到車，有冇計過每個月供樓要幾錢？ 150萬樓價，借九成半，即係 142.5萬蚊，分 30年還，以實際按息兩厘半計，月供 5630蚊，差唔多係佢家陣人工嘅一半。

正所謂「莫欺少年窮」，敏妮唔敢睇死佢兩年後仲係得萬鬆啲蚊人工，但聽股壇前輩講，當年佢嘅人工每年以雙位數百分比調升，但香港過咗高增長期，除非你有條件兼有運，不斷俾人高薪挖角，否則靠 organic growth，每年有幾個巴仙已經唔錯。覺得自己薪金會三級跳嘅，就等嗰時先置業！