敏妮Talk

唔知點解，好多朋友都鍾意揀年尾拉埋天窗，敏妮就有個朋友星期五聖誕節當日擺酒，一班朋友唔使諗約去邊度慶祝聖誕，一於結婚喜宴同埋 Christmas party一齊搞。席間又有另一位朋友靜靜雞同敏妮公佈喜訊。

靜靜雞嘅原因，係因為呢次係佢再婚之喜，所以佢選擇低調一啲。不過，敏妮同佢嘅家人有同一反應，「咦，乜你終於同前夫搞好離婚手續嗱！」有此一問，係由於佢同前夫一齊夾錢買樓，屋企裏面嘅家具、電器，又係兩個都有出錢，佢哋仲開咗聯名戶口，雖然兩個人分開之後，再見亦是朋友，但兩個人都嫌麻煩，一直冇處理資產分配嘅問題，亦冇正式辦離婚手續。

其實家具電器，甚至聯名戶口相對容易解決，好似家具電器咁，大不了放上網賣，大家分錢。至於聯名戶口由於有進支紀錄，加上過去幾年銀行存款利息唔多，按紀錄分配即可。最大問題係層樓，本來賣咗分錢就可以解決，但大家對樓市有唔同睇法，又大家都驚睇錯市，所以睇好嗰個，即使有信心層樓仲會升值，都唔敢貿貿然買埋另一半。至於睇淡嗰個，一直都開唔出究竟幾多錢先肯賣。

須商討財務安排

結果兩個人分開後，協議將物業出租，扣除開支，大家平分租金收入。不過，現時各自有新嘅伴侶，始終要處理離婚嘅財務安排。敏妮記得，之前都喺專欄提過另一對離婚夫婦，又係要面對財務安排。如果敏妮話，即使係夫婦都要財政獨立，相信又會俾人話好 mean。

敏妮仍然建議呢位朋友，同前夫一齊搵位中立嘅理財顧問，商討財務安排，正式辦離婚手續。至於新一段姻緣，就要學懂財政獨立。識唔識學乖，係佢個人選擇，當然敏妮都希望個個白頭到老！

呢排睇港交所（ 388）大股東增減持嘅資料，經常見到超人李嘉誠增持旗下公司。前嗰排，超人主要增持長實（ 001），近日就加埋和黃（ 013），可能正如曾淵滄博士之前講，美國繼續印鈔票，房地產泡沫就會出現，所以超人增持得咁頻密係有道理。

睇番資料，超人大多數時間都係買長實，和黃就比較少。好多人都覺得大孖沙增持自己公司，跟得過，因為佢哋熟悉自己公司情況，真金白銀入市買，梗有啲把握。敏妮記得舊年都做過一個小小統計，發現超人增持真係有參考價值。除咗 00年 6月，佢以 80幾蚊價錢增持長實，之後經過一輪反彈後，股價拾級而下，跌到 03年沙士時嘅 40蚊水平。之後兩次連番增持，跟超人都有錢賺。

李嘉誠連番增持長和

05年 6月 13日至 22日，長實大概 72、 73蚊左右時，超人增持，同年 8月股價升至 88.7蚊。 07年 5月 29號開始，至同年 7月 11日，超人增持咗長實 17次，由平均價每股 100.124蚊，買到平均 110.289蚊，其後長實股價回升，到嗰年嘅 10月，升至 158.5蚊。

相比起長實，超人增持和黃嘅行動少好多，好似 06同 07年，即使勁掃長實，都冇乜點買過和黃。不過，一係唔出手，一出手就唔講得笑， 04年 8月開始掃，到同年 10月，共 23次，用咗超過 23億銀，增持逾 2300萬股，平均價最高都唔過 73蚊。結果和黃股價踏入 05年就開始反覆上升， 05年 8月升到上 81蚊。

今次超人同時掃長實同和黃，以前好似未試過，除非另有原因，否則以超人過往增持嘅往績參考，跟超人分段入市，不失為冇方向底下嘅一盞明燈。

個禮拜，敏妮追住睇嘅新聞，除咗東亞運動會一幕幕港隊報捷新聞，仲有係高錕教授領諾貝爾獎嘅新聞。一篇高錕太太黃美芸嘅訪問，講到由於美國醫療保險，唔包括嗰啲尚未獲食品及藥物管理局通過嘅藥物開支，所以會利用諾貝爾獎金，等高教授接受到老人癡呆症新藥治療。

朋友問敏妮：「乜保險唔保老人癡呆症 o架咩？」咁又唔係，敏妮睇過一啲危疾保險，受保嘅危疾包括「阿滋海默氏症（ Alzheimer's Disease）」，而阿滋海默氏症係最普遍嘅癡呆症。不過敏妮問過啲保險業嘅朋友，佢哋估計高教授買嘅係醫療保險。因為即使喺香港，雖然醫療保險係實報實銷嘅保險，即係接受咗乜嘢治療，保險公司會按保單提供賠償。不過，對於嗰啲未經核准嘅新醫療方法或者藥物，保險公司就唔會包括在內。相信高錕教授由於係接受未經美國食品及藥物管理局批准嘅新藥，所以保險先至唔包。

部份危疾有年齡限制

危疾保險同醫療保險定義唔同，危疾並唔係實報實銷嘅保險，同買壽險情況一樣，係一個定額嘅賠償。講得白一啲，即係中 jackpot，如果投保人不幸患咗受保危疾名單裏面嘅病，就會獲得一筆過嘅現金。原意係患上危疾嘅人，一旦患病就可能唔可以工作，或者需要一筆錢解決燃眉之急，所以保險公司就提供一筆過現金，患病者除咗用筆錢解決燃眉之急，亦大可以攞筆錢去試新療法。

不過要留意，保險公司部份危疾保障有年齡限制，有啲保障至 65歲，「老人癡呆症」係上咗年紀嘅人患病機會高啲。好似高教授咁，佢發現患呢個病時，可能已經過咗受保期，都係攞唔到錢。

「肥」係女人嘅公敵，但有一日可能成為納稅人嘅公敵。因為前幾日，立法會議員提出咗擴闊稅基，不如開徵「肥胖稅」嘅建議。公司兩位小妹妹，噚日食住薯片同敏妮呻：「日後收『肥胖稅』，我實要畀，歧視肥人呀！」
最早提出「肥胖稅」嘅，應該係世衞組織，佢哋嘅出發點係正面嘅，原因有好多病都係由肥胖引起，為免加重醫療系統負荷，所以提出用徵稅嘅方法，遏止大家肥胖。不過由於涉及歧視，所以俾人反對。

至於家所謂嘅「肥胖稅」，都有唔同嘅版本。之前有廉價航空公司為咗節省成本，增加收入，提出向體重超磅嘅乘客徵收「肥胖稅」。

敏妮都試過坐飛機時，遇上旁邊嗰位係一位頗肥嘅男士，敏妮三分一座位俾佢佔據，肥胖男士都覺得唔好意思，但飛機又滿座，惟有焗坐。敏妮唔係歧視，但每個人都應為自己嘅事負責，既然你嘅身形係要佔兩個位，咁應該畀兩張機票錢，好似行李超磅要畀錢一樣。

向垃圾食品徵稅

另一個版本嘅「肥胖稅」，就係歐美一啲地區，向令人致肥嘅 junk food好似汽水、薯片咁徵稅，好似徵收香煙稅咁，而唔係兩位小妹妹以為，超磅幾多，按磅數計稅。對於呢個層面嘅「肥胖稅」敏妮就有啲保留，事關敏妮都好鍾意食薯片，飲汽水，尤其壓力大時，更加會用嚟減壓。

不過諗深一層，正如世衞嘅出發點，肥胖係唔少疾病嘅元凶，控制體重，食少啲 junk food，其實百利而無一害，對健康好啲，就可以慳番啲醫療費。敏妮聽過，外國有啲保險公司會徵收附加費，原因亦係「肥＝唔健康」。
不過，香港政府開徵新稅種要過五關斬六將，就算成功可以開徵，兩位為食小妹妹應該有足夠時間減肥！

明年對一眾會考生嚟講，意義重大，因為佢哋將會參加「末代會考」。講得係末代，即係冇 take two，敏妮認識一位小妹妹就係應屆「末代會考生」，由於「要回頭」會很難，所以佢非常「揼本」，參加坊間某補習天王嘅會考補習班。

會考對於敏妮嚟講，已經係頗舊嘅回憶，不過聽呢位「末代會考生」講家陣嘅補習班，真係幾好賺。據小妹妹講，佢雖然報讀補習天王教嘅班，但從未見過天王真身，上堂只係睇電視播碟，原來天王將教材輯錄成光碟，每次上堂就係播碟。不過小妹妹仍然津津樂道話：「內容一啲都唔悶，會用動畫深入淺出講書本內容，啲動畫好靚 o架。」

即使見唔到天王真身，但據聞學費一啲都唔平，敏妮忍唔住衝口而出，「吓，播碟都收咁貴，包及格、包攞 A呀！」
點知「末代會考生」答：「係呀，你有得揀 o架，有保證攞 A嘅補習班，如果攞唔到 A，會退番一半錢。不過呢個保證攞 A嘅班，收得仲貴。另外有一個平啲嘅，係保證及格班，如果攞唔到 C級以上，又係退番一半錢。」

開包達標理財診療室

敏妮突然「魔鬼」上身，不如整個「包達到目標嘅理財診療室」，好似《理財版》嘅「理財診療室」咁，幫人度身訂做 portfolio，例如 10年儲千萬退休、 5年儲首期上車，既然包達標，當然唔會免費提供服務，但就包你達標，否則原銀奉還。試諗， run份 portfolio出嚟冇乜本錢。你想達到目標自己自然會努力，就算真係唔達標，甚至蝕錢，敏妮最多都係退番之前收嘅錢。最重要係，錢就一早收咗，就算日後要退還，中間嗰段日子，敏妮都收咗幾年息啦！

相信補習天王真係幫到唔少學生考到好成績，唔似敏妮咁市儈！