敏妮Talk

財政預算案講得最多係樓市，推咗 4個措施幫市民置業。公司位 auntie好勞嘈，話電視訪問個後生仔，俾人問到活化居屋措施，後生仔話冇用，因佢唔會買居屋。 auntie話：「後生仔頂多咪做咗幾年嘢，居然嫌三嫌四。」

敏妮成日都有個疑問──政府係咪有義務以納稅人嘅資產幫所有市民置業？可能你會話，「你有樓梗係講得口響！」敏妮同意，對於老弱無依嘅人，政府有責任令佢哋有安身之所，所以建公屋係正確嘅。不過，置業係一項投資，擁有自己嘅物業應該係各人為自己確立嘅目標，並唔係政府責任噃！

訂購半年免費聽講座

講返近排嘅股市相當波動，喺呢啲市況，敏妮日日睇住「港股王」名家畀方向。好多朋友問，「使乜畀錢訂嚟睇，睇報紙咪得囉，都係同一批人講之嘛！」咁講就損失咗好多獨家貼士。雖然話「港股王」嘅名家差唔多都喺《蘋果》財經有專欄，但佢哋喺兩個地方提供嘅意見同貼士都唔同。有睇過「港股王」嘅就知，有時朝早要望穿秋水先等到名家貼士，尤其股市越波動，嗰日嘅貼士就越晏，因為啲名家睇住大市走勢畀貼士、畀方向，有時見大勢唔對路，寧願叫訂戶忍手咪掂。

敏妮之前聽理財版版主講，部份「港股王」訂戶面對咁多位名家嘅貼士，唔知應該點樣調整投資組合，希望敏妮幫手畀意見。敏妮點敢喺咁多位名家嘅貼士之後加意見，最好面對面問啲名家，將自己個倉拎畀名家睇，問吓佢哋意見。呢幾日敏妮見「港股王」嘅廣告，話訂半年就可免費去聽講座。講座有齊曾淵滄、沈振盈同胡孟青 3位名家！對於部份訂戶嚟講，可能覺得一次過畀半年「甘」咗啲，但如果用信用卡畀，其實都係每個月按月費過數，唔使一次過畀晒錢 o架！

敏妮曾經提過，有朋友每年封畀囡囡嘅利是，都係一個金幣。黃金保值，又起到資金避險功用，但冇息收，只可以靠升值，所以亦有朋友選擇每年買一手股票畀仔女。

原來喺大陸都有唔少父母，用股票嚟「封利是」。前幾日睇內地網站，見到一篇文章，講到內地有啲家長，本身有投資股票，每年都會買一手股票畀仔女作壓歲錢。

據文章講，有位蕭山私營企業嘅老闆，囝囝今年 11歲，佢由個仔出世到家陣，每年春節前後一個交易日，都會買 500股銀行股送畀個仔做壓歲紅包，第一年揀咗當時上市冇耐嘅浦發銀行，後來工行（ 1398）、中行（ 3988）、建行（ 939）等銀行股都有買過，囝囝嘅投資組合已經有 6隻內銀股。佢之所以揀銀行股，係因為覺得銀行作為國家經濟發展嘅重要部門，冇倒閉風險，亦會跟住中國經濟發展而壯大。佢仲話，雖然股市有起有跌，但長期嚟睇，會係一筆化算嘅投資。

文章仲提到另一位爸爸，好杯中物，尤其鍾意飲茅台，所以每年買 300股貴州茅台畀個仔，由開始買到??家，盈利翻咗好幾番。

敏妮嘅朋友有啲唔同，每年都買同一隻股票畀囡囡，敏妮問佢揀邊隻股票送畀女兒時，佢問咗敏妮一個問題，「滙控（ 005）係好多人用嚟儲蓄嘅股票，但滙控畢竟已經過咗增長最快嘅 20年，敏妮，你認為邊一隻股票未來 20年會有快速增長，成為下一隻滙控？」呢隻股票正係佢深思熟慮後，每年封畀女兒嘅利是。

其實，點樣為仔女揀股票，大家有唔同睇法同心水，除咗要計較股票實質價值，最重要係有父母嘅心意，可以令子女明白到時間對財富累積嘅效應。

新春假期天寒地凍，敏妮一口氣買咗幾隻 DVD留喺屋企煲碟，睇咗隻黃子華其中一輯棟篤笑。有段內容講，有理財顧問向佢推銷基金，話每年有幾多幾多回報，過 30年後就有成千萬銀，可以退休。佢質疑點解幼稚園唔教啲小朋友買基金，如果讀幼稚園已經開始投資，根據個理財顧問講，在座嘅觀眾大部份家陣已經唔使做。

當然條數唔係咁計，假設活到 80歲， 30歲就退休，要過 50年退休生活，同你 50歲退休，過 30年退休生活，當中相差 20年搵錢及使錢時間，預備嘅退休金會有好大差別。但投資越早越好，??家好多家長早喺小朋友未出世，已經有教育計劃，儲蓄教育基金。前幾日同契大佬 Kenny一家飲「開年茶」， Kenny問：「我淨係識將兩個女嘅利是存入銀行，究竟有冇其他辦法，可以幫佢哋嘅利是錢增值？」

家長與子女齊參與投資

前幾日，公司位「隱世畢菲特」提供咗隻房產基金穩定收息，咪以為只得大人先可以投資基金股票，小朋友都可以參與。敏妮當然唔係叫 Kenny幫兩個女開股票戶口炒股，就算佢想，但兩個女咁細，都冇銀行或者股票行幫佢做。敏妮所講嘅係 Kenny以自己嘅名義開投資戶口，兩個囡囡一齊參與投資。

雖然兩個囡囡仲讀緊小學，但家陣啲小朋友唔可以小覷。敏妮就認識一個小朋友，幾年前仲讀緊小學，每朝爸爸都會帶佢去大家樂食早餐，日日都見好多人排隊，佢同爸爸講，「如果我係呢間快餐店嘅老闆就好，日日都有咁多人幫襯。」爸爸就用囝囝嘅利是錢加自己補貼買咗手大家樂（ 341），由佢買嗰陣到家，股價升咗唔少。當然小朋友未必次次「開口中」，但家長可同佢哋一齊分析，可以促進親子感情，分分鐘可以教學相長。

大年初四，開工大吉！一班同事食開年飯，公司位 Auntie問：「你哋點樣用啲利是錢？係咪拎去投資？」咁先要知道大家到幾多利是，對於敏妮呢啲未嫁得出嘅港女，新年當然收到唔少利是，但多極都係四位數字，公司有位小妹妹就好雀躍，話到三千幾蚊，會拎去買嘢消費。

「喂， Auntie問點投資噃！」小妹妹就話：「得 3000蚊左右，唔通買基金、炒股票咩，我買個名牌袋，可以保值。再唔係，買對鑽石耳環，鑽石都保值咯！」小妹妹好明顯係消費掛帥，但並唔實際。就以名牌袋為例，幾千蚊貨色，好難要求轉手有錢賺。至於鑽石嘛，要有番一卡半卡兼係完美嘅，先至有升值能力。
咁究竟 3000幾蚊，可以點投資呢？

越房股息率 8厘

細 May話買金。得！不過 3000幾蚊買飾金，並唔化算，而且用嚟投資，飾金會浪費火耗，可以選擇投資紙黃金，如果揀實金，最好直接買金條或者金幣，恒生銀行（ 011）嘅財神金牌 10克重，賣 3000幾蚊。雖然投資黃金冇利息回報，只可以博升值，但敏妮認為，喺投資組合裏面，黃金應佔有一定比例。加上喺通脹時期，商品價格可以睇高一線，就好似儲錢或者供股票咁，每年將利是錢買少少黃金儲，積少成多兼可以保值。

除咗黃金， Auntie問有冇其他投資建議，公司位「隱世畢菲特」就話「買 REITs啦！」仲隨手喺股票機度㩒咗隻越秀房產（ 405），一手 3000蚊左右，約 8厘 yield， 09年中期息一手收百一蚊，夠飲餐茶咯。

利是係長輩給予後輩嘅一份祝福，如果善用嚟作投資，將賺到嘅錢回饋長輩，就更添一重意義。

賣花只會讚花香，從來發展商只會唱好樓市，前幾日，長實（ 001）執行董事趙國雄居然唱反調，話本港樓價升勢有啲唔尋常，可能會出現調整，仲提醒市民留意樓市泡沫。敏妮翻查過，由 98年至今，長實主席超人李嘉誠對樓市嘅評論唔少，但唱淡樓市就唔係好覺，頂多係 01年初開聲叫過停建居屋，今次佢嘅手下居然公開唔睇好樓價走勢，背後有乜玄機？

地產界睇淡樓市嘅，頂多係地產代理喺樓市悶局時，造好唔得就唱淡，希望幫買家向業主壓吓價，促成交易之餘，自己亦都賺到佣金。至於發展商唱淡，似乎對自己冇乜好處。

敏妮印象中，趙國雄係一流推銷員，每次推盤佢都粉墨登場、扮鬼扮馬，唔使俾咁多廣告費都可以博到見報，幫老闆慳唔少。所以今次佢唱淡樓市，可謂相當弔詭。敏妮問過一個地產界嘅前輩，佢都百思不得其解，「可能係佢哋近期冇盤推，但遲啲都要推盤，冇理由唱淡。」

自行降溫效用不大

由於今個月底，有幅將軍澳地皮會拍賣，所以有人估趙國雄想先行唱淡樓市，為市道降吓溫。亦有人認為，好似內地咁，樓價太過唔理性，遲早會逼到政府出手壓一壓，財政預算案就快出籠，最好趁家陣先自行冷卻。

不過，要冷卻樓市，除非係各地產商不約而同玩大合唱，否則只係得一個人 solo，效用有多大唔使講，所以究竟今次發展商唱淡事件，背後有乜玄機，大家要動吓腦筋。

敏妮有很多朋友都計劃置業，但由於樓價不斷咁飆升，所以仍然停留喺「計劃」嘅階段，未有實行，今日係年廿九，敏妮預祝有心置業嘅朋友，虎年心想事成。

近排大市不濟，股票投資成績麻麻，所以盡量唔掂。問題係，坐緊艇嘅貨點算好呢？

上個禮拜，敏妮睇「港股王」（ http://stock.nextmedia.com）名家貼士，睇吓有冇乜嘢啟示同方向，見到名家之一邱古琴提供嘅並唔係股票貼士，而係期權策略。

好多人一聽見期權就唔願聽落去，因為覺得期權係衍生工具，風險高。不過，敏妮就聽過一位對期權非常熟悉嘅前輩講，喺波動市況下，投資期權比炒細價股仲穩陣，即使股票坐艇，亦可以藉期權降低持貨成本。

波動市投資期權

喺賭場，贏嘅唔使講，一定係莊家，至於喺股票市場，大戶往往就做咗莊家嘅角色，所以好多人都覺得，股市俾大戶玩晒，散戶只可以喺大戶手指隙度搵食，一個唔好彩仲會任由大戶魚肉。前輩講，期權係唯一散戶可以同大戶公平競技嘅平台，只有期權先至可以由散戶做莊家。

前個禮拜，敏妮睇咗一篇東尼徒弟林少陽嘅訪問，裏面除咗提到林少陽點睇今年環球經濟及股市走勢，亦有提供投資策略，佢不諱言，以期權策略保護自己嘅投資組合，每逢股市大跌時，就會入市執平貨，每逢股市上升，就買入股票或者指數認沽期權，當係為股票投資組合買保險。雖然大市上升，認沽期權會有損失，但一旦市況逆轉，投資組合就唔會「蝕入肉」。

星級基金經理都需要利用期權組合嚟保護自己嘅投資，一般散戶又點可以「赤裸裸」將自己嘅股票投資，毫無保護咁暴露喺波動嘅市況中。問題係，市面上提供股票貼士嘅渠道多，教人炒窩輪、牛熊證嘅亦唔少，偏偏教期權、談論期權，甚至對期權有興趣嘅，就好少，有關方面真係要好好推廣。

敏妮認識一位朋友，有「早啲退休」嘅目標，但佢退休並唔係想唔做嘢、嘆世界，佢計劃中嘅退休生活，相當有意義。

朋友喺證券界打滾好耐，正如佢話，喺呢個圈嘅人，搵錢唔難，只係買到間過千呎嘅樓，就想換間兩千呎嘅。到有兩千呎又想有間獨立屋，前後有花園……「慾念無限，人生有限呀敏妮！」朋友話，買到間千呎嘅樓，等個囝囝住得舒服就可以收山，之後並唔係蹺埋雙手嘆世界，「到時去教書，教人點理財，我知份糧同??家差距會好大，但收入夠我一家大細嘅醫療保險就夠。」

朋友想做嘅理財教育工作，並唔係去教 CFA或者 CFP，而係教親子理財。正確嘅理財觀，一定要從小灌輸，但家陣好多父母都唔識理財，莫講話教細路。朋友唔係單講理論，而係有實際行動。佢得閒會帶個仔行「天光墟」，睇吓低下階層嘅消費模式，從而明白即使係一蚊幾毫，對低下階層嚟講都好重要。

學選擇　要格價

朋友仲同囝囝身體力行，每當囝囝要買玩具，朋友都有兩個要求，首先要佢喺自己嘅玩具中，揀一件出嚟作慈善捐獻。朋友解釋，要令囝囝學習選擇，當懂得選擇，就會知道乜嘢係重要。

另一個要求係要格價，佢會帶囝囝去經常光顧嘅玩具店，囝囝就要做吓功課，記得邊度買玩具價格會平啲。為咗令個仔「肉緊」啲，佢會話明，如果買咗件玩具 3日之內見到有更低價嘅話，囝囝要喺零用錢度賠番個差價。當然，遇上間公司突然減價，囝囝就可以豁免被爸爸罰賠差價。

敏妮朋友 L君星期六請敏妮 dinner，好日唔見，突然叫食飯，事關佢有個「非一般」嘅投資問題要搵敏妮畀意見。

話說 L君嘅保險 agent向佢推銷月供基金，每個月要供一定金額，由於以投資為主，所以保險成份佔好少，日後供滿可以有唔錯嘅回報，但期間唔可以停供。

由於覺得個投資計劃冇乜彈性，所以 L君唔感興趣，但佢同敏妮講：「我同 agent講，『不如直接幫襯你買基金啦，唔月供喇。』叫做應酬吓個 agent，點知佢好似唔係好想我直接買，仲係不斷 sell我月供基金。其實佢都開到單，做到生意。何況我買咗基金，同佢 keep住關係，佢日後仲可以再 sell我其他產品，點解佢唔先做咗呢單生意先？」

針對目標免亂投彈藥

單憑 agent嘅態度，就知 sell出月供基金，佢得到嘅佣金會大過直接叫個客買基金。何況講得係應酬，即係唔會買得多。加上既然都應酬咗、幫襯咗，個 agent仲點 sell你月供基金啫。問題反而係，點解 L君為咗要應酬個保險 agent，本來唔想投資基金，都要買呢？「個 agent幾靚女！」

L君似乎喺任何一方面嘅投資，都用錯咗方法。首先，為咗討好靚女 agent去買基金，而買嘅又唔係靚女 agent力 sell嘅，你係個 agent都唔會對 L君有好印象啦！

敏妮同 L君講：「如果你真係對個 agent有意思，就直接投資喺追求佢身上。如果你真係想買基金，唔該你就直接搵間基金公司，睇清楚自己可以承受幾多風險、基金投資策略，同個人需要，先去買基金。」

無論投資抑或做其他工作，認清目標之後，最緊要係針對目標嚟做，旁門左道或者藥石亂投，好大機會嘥錢兼嘥心機。