敏妮Talk

自從數碼通（ 315）有得出 iPhone後，敏妮身邊唔少朋友都即刻出機。其實好多朋友已經等咗好耐想出 iPhone，但礙於之前只得一家電訊商有得出，無論提供嘅服務抑或收費，都因為冇競爭而變得唔吸引。家陣有競爭，唔單止機價平啲，電訊服務收費亦降低咗好多。

講開出 iPhone平咗，原來唔少人因為咁而諗到條財路。家陣出 iPhone價錢平，唔少人透過電訊商出 iPhone，但就用最平嘅收費 plan，志在平機價買 iPhone，跟手就將部 iPhone拎返大陸賣。

降服務收費攻市場

同敏妮講呢個故事嘅朋友話，同買名牌袋一樣，水貨袋比喺名牌店買嘅平，自然有客路，對於走水貨嘅香港人嚟講，除咗貨本身嘅差價，更吸引係賺人民幣。雖然話吸引，但敏妮就唔識計條數嘞，就算可以平價出機，但要簽兩年合約，即使最平個 plan，計埋啲雜費，兩年都超過 4000蚊，如果齋賣手機畀大陸客，咁之後啲月費點？成本唔平噃！不過，朋友就言之鑿鑿話，由於好多人去電訊商度買機走水貨，令到 Smartone嘅前線銷售員做到唔停手。

敏妮反而諗，如果咁多人幫襯 Smartone出 iPhone，相信對佢盈利有好大幫助，呢個會唔會係呢年 Smartone盈利嘅增長點呢？若然係，咁數碼通嚟緊嘅業績應該好令人期待。就喺敏妮諗緊呢個投資主題時，好快就俾朋友潑冷水。據呢位聲稱識人喺電訊商做嘅朋友講，為咗爭取市場佔有率，電訊商家都以平搶攻，應該賺得好微利。

電訊商賺幾多要等公佈業績先知， iPhone對電訊商盈利影響應該都係正面，敏妮都要留意呢隻股有冇好消息。

踏入業績期，加上經濟好，版版有廣告，所以敏妮同理財版經常要讓路。

財經新聞咁重要，讓出版位理所當然，就好似近期睇蘋果財經嘅網上節目「港股王」，新加插咗「報告王」同「國策王」兩個新環節，其中「國策王」提供最新國策新聞，仲有埋分析，最正係附加埋相關嘅受惠或者受累股份，直情係餵埋你食咁貼心。

發短訊畀貼士

不過，更加吸引敏妮嘅係「報告王」，呢個環節推出咗幾日，敏妮訂埋 SMS短訊服務，發現佢哋發畀訂戶嘅短訊好有參考價值，就好似星期三，敏妮收到「報告王」短訊，話摩根士丹利首次畀海爾（ 1169）買入評級，目標價睇 6蚊，仲撮要咗報告嘅內容，話公司正積極發展農村電器分銷網絡，配合當地市場需求急升。

敏妮見摩笛一向幾靈，所以小注跟吓，結果兩日升咗超過半成，既然係小「炒」怡情，所以敏妮亦冇等到大摩嘅目標價，自己食咗糊先，贏咗幾千蚊，當係用嚟計劃旅行嘅旅費。

講開又講，大行報告係咪份份信得過又真係見仁見智，一份報告可唔可以動搖到股價，有時好睇間證券行嘅份量，除咗證券行，有時仲要睇埋係邊位分析員出嘅報告。睇開財經版嘅可能都會知，財經界有唔少「星級」分析員，佢哋突然轉 views梗有啲原因，所以市場人士會作為參考。

除咗星級分析員，股王 A仲話，一啲二線都未必入到嘅三線尾四線頭公司，通常冇乜大行會為佢哋出報告，如果突然有大行出份奀豬公司報告，咁就要非常重視嘞。事關大行報告為大戶服務，唔好嘢嘅話大行都唔會嘥時間理，出得通常都有啲嘢。

上星期敏妮同靚太公關 V食晏，聽佢大呻投資慘痛經歷。公關 V無論買股票定買基金，都係近乎摸頂時去買，結果坐艇，就連買保險都遇到保險經紀轉工唔做，張保單變咗「孤兒單」。公關 V擔心自己嘅保單變咗「孤兒單」之後亦冇人理，所以考慮跟舊經紀轉過間保險公司。

當然，有個相熟經紀，有乜事打個電話就可以 update保單情況，或者幫你跟進索償。不過，即使你嘅保險經紀係朋友、親戚，一直都跟你份保單跟得好足，但都難保佢唔會轉工。好彩嘅話，接手嘅經紀好有責任感，但相信大部份「孤兒單」持有人都未必遇到合適嘅經紀接手。

「轉會」或影響受保條款

敏妮建議公關 V都係自己睇緊啲。首先敏妮唔贊成佢跟舊經紀「轉會」，因為新保單可能有新條款，之前受保範圍可能轉新保單後唔再受保。加上舊經紀如果一旦又轉工，唔通佢又跟住轉咩！

唔跟舊經紀轉，原有保險公司應該會提供另一位經紀畀佢，如果接手經紀 sell新保單的話，敏妮亦唔建議買，原因係喺購買現有保單時，你應該已經做晒分析，知道自己需要乜嘢，所以先買，冇必要因為轉經紀而轉咗自己原有嘅計劃。如果新經紀因為你冇幫襯而對你不聞不問，你亦要有心理準備，一切靠自己。

正如之前所講，喺買保單前你應該已經清楚明白自己嘅需要而購買合適嘅保險，之後跟進工夫應該唔多，如果只係 update保單狀況同自己當時嘅需要，即使有保險經紀跟，最後都要自己分析同落決定。至於驚索償時冇經紀幫手，你大可以直接打電話去保險公司嘅客戶服務部要求處理。千祈唔好因為貪方便，轉咗份保單或倉卒落錯決定。

整理敏妮 Blog時，見到有位朋友對上月初，敏妮一篇講用期權保護投資組合嘅文章有啲意見。佢認為「散戶絕對冇做對冲嘅需要！因為如果覺得個市差唔多，散戶嘅做法可以沽出股票，唔係買多張衍生工具！」
如果你知個市差唔多，就梗係識沽咗啲股票，問題係邊個有水晶球？敏妮月供滙控（ 005），金融海嘯期間睇住滙控日日跌。

散戶面對跌市只有兩個做法，一係沽出止蝕，一係坐艇等運到。敏妮用咗第三個方法，沽出認購期權 short call，最後由於未到期權嘅行使價，敏妮繼續持貨兼收咗期權金，令持貨成本降低。大戶同散戶都係真金白銀投資，大戶可透過對冲保護投資組合，散戶點解就冇呢個需要？

遊戲訓練投資態度

最近好喜歡玩一個喺 iPhone App store下載嘅遊戲 Tap'n'Pop，原因係佢嘅玩法可以訓練敏妮嘅投資態度。

遊戲開始時會有一整版不同顏色嘅波，遇到上下左右嘅波顏色相同就可以輕拍（ tap）整爆（ pop），每次 tap咗啲波就有分，累積至某個分數遊戲就完，整個遊戲鬥嘅係累積多啲波先 tap。敏妮起初貪心，關鍵時刻為咗再增加波嘅數目， tap咗另一啲波，結果 game over。其實投資時，敏妮都經常犯同樣嘅錯，希望隻股票升多啲先沽，結果錯失獲利機會。

玩 Tap'n'Pop另一策略係，譬如你累積緊藍色嘅波，但有幾個藍波喺上面幾行，阻咗下面成排藍波上移，要 tap咗上面嘅藍波先可以「賺」到下排更多波，呢啲時間就唔好孤寒。好似投資時，部份股份唔係冇賺，但盈利少得可憐，「食之無味，棄之可惜」，以前敏妮會唔理，但咁樣其實係浪費緊機會成本。投資有時係需要犧牲一啲之前累積但唔多嘅成果，造就更豐富嘅收穫。